Di tres edishon di Curaçao Clean Up riba djasabra 19 di sèptèmber.
WILLEMSTAD— Fundashon Curaçao Clean Up ta bolbe hasi un yamada pa un i tur inskribí via www.curacaocleanup.com i duna un man durante e akshon di limpiesa anual. E organisashon ta spera ku por medio di e proyekto di edukashon “GreenKidz” i e lei nobo ku a kaba di pasa, despues di CleanUp a largo plaso nos por yega na un Kòrsou mas limpi. “ Nos ta mas serka na logra un Kòrsou realmente mas limpi, pero nos no a yega ainda”, segun presidente di e fundashon Maarten Schakel.
Djarason mèrdia dia 12 di ougùstus, e akshon anual a ranka sali den ouditorio di Dolphin Academy. Entre 30 i 40 lokalidat lo ser limpiá riba djasabra 19 di sèptember i shushi ku ta ser tirá abou aki aya, shushi masal di dump i e shushi kantu di nos kostanan i bou di lamán lo ser rekohé. Manera tur aña lo tin lokalidat bou di awa, kantu di kosta i algun playa i lugánan rònt Kòrsou den diferente bario. Nobo e aña aki ta un limpiesa masal di Klein Curaçao huntu ku Curaçao Sea Turtle Conservation.
E organisashon ta spera di por konta ku mas o menos 2000 boluntario. Banda di personanan ku ta inskribí komo individual, nos ta kontentu ku e partisipashon di diferente kompania, spònsòr finansiero, spònsòr di material manera ‘trucks’ i ‘loaders’, pero tambe di harpa, djùk i hanskun. Personanan òf instanshanan interesá den sostené por tuma kontakto via di e website di Curaçao Clean Up.
Edukashon i konsientisashon
Pa hasi nos muchanan mas konsiente di e importansia di un medio ambiente limpi, e proyekto “GreenKidz” lo kuminsá e aña eskolar aki. E organisashon di Curaçao Clean Up i inisiadónan Maya Mathias i Ivonne Zegveld a akordá un kolaborashon intensivo. E kolaborashon lo mester duna resultado den forma di diferente lèsnan na diferente skolnan, proyektonan konkreto, un korant “Greenkidz” pa mucha i un fiesta espektakular pa mucha.
Leinan di Medio Ambiente
Curaçao Clean Up ta haña e “Landsverordening Openbare Orde” ku pasa dia 29 di yüni den Staten i ku ta inkluí e leinan di medio ambiente sumamente positivo, pero ta enfatisá ku tin hopi kos ku a ainda mester ser realisá. Schakel ta kompartí:” E siman aki nos tabatin un kombersashon ku representantenan di OM. E leinan ta kla. Awor a yega ora pa disidí kiko e sanshonan spesífiko ta bira. Ki but bo ta haña ora bo tira un bòter di serbes for di outo? Kiko lo pasa si bo tira un seru di shushi di konstrukshon den mondi?
Aworaki e personanan enkargá ta pronostiká ku lo por indiká esei aki dos luna. I despues ta bini e reto mas grandi: Kontròl i represhon. Tin un skarsedat di polisnan èkstraordinario di servisio di medio ambiente lokual ta buta ku no por hasi e trabou efektivo.
Den kuadro di medio ambiente, ainda no tin polis èkstraordinario spesífiko, manera por ehèmpel Stanley Ignacio ta ehersé pa kontrolá trato di bestia. Ne momentu aki nos ta dependiente di kontròl di polis. Nos ta urgí esnan responsabel pa bini ku un maneho formal i amplio. Esaki lo ta benefisiosó pa nos isla kompletu i naturalmente na agrado di e miles di boluntarionan di Curaçao Clean Up ku ta duna di nan pa limpia partinan di nos isla.
Organisashon
Curaçao Clean Up lo ser organisá pa di tres biaha. E lastu dos añanan a rekoudá mas ku 750 mil kilo di shushi. E akshon ta ser organisá dor di Chata, Coca-Cola, Curaçao Cares, Curious2Dive, Dolphin Academy, Fundashon Kòrsou Limpi i Bunita, Green Force, MRC Engine Rebuild i presentadó di radio Maarten Schakel.