WILLEMSTAD- Manera ya ta konosí, e preparashonnan ta den full swing pa e anochi final di Miss Curaçao Teenager 2014. E aña aki, e sertámen lo karga e tema “ WELCOME TO OLYMPIA”. Dia 12 di Yüli benidero 8 hóben bunita, talentoso i yen di potensial lo kompetí pa e titulo final. Ta ken lo hiba e titulo máksimo? Ta ken lo ta nos Miss Curaçao Teenager 2014? Pa nos di International Beauty and Fashion Foundation (IBFF) ta di importansia pa kada un di e hóbennan aki risibí un preparashon na nivel, kual lo mester yuda formanan riba tur área di nan bida. No solamente ta wòrdu enfoká riba e parti di makiyahe i modelahe pero tambe riba nan kresementu personal, nan konosementu, nan abilidatnan sosial i nan futuro karera profeshonal. Pa e motibu aki e hóbennan a bin ta sigui un siklo di formashon intensivo durante e 4 lunanan tras di lomba. Aki un rekapitulashon di Miss Curaçao Teenager 2014 pa loke ta trata luna di Mei último. Durante luna di Mei nos partisipantenan tabatin diferente charla i workshop interesante manera entre otro charla tokante Outo-estima duná pa sr. Armand Hellement Jr., charla Mayor i Yu duná pa sra. Marelva Jansen-Liberia, charla tokante polítika di Kòrsou duná pa sr. Liorgo Rosa, charla tokante e efekto di ‘Social Media’ duná pa sr. Gwendell Mercelina Junior, Workshop di Makiyahe duná dor di sr. Luis Castillo di Revlon i nan tabatin nan di 4 charla di Public Speaking duná pa sra. Saidiri Sling. Partisipantenan tambe a haña guia pa traha riba nan portafolio personal dor di sra. Ruth de Lanoy y sra. Maylin Trenidad. Tambe nos partisipantenan tabatin e honor di a tuma parti den diferente entrevista na radio i televishon durante di luna di Mei último. Públiko por a apresiá nan den entre otro e programa Glamur ku sra. Monique Koeyers-Felida na kanal 8, den New Day ku sra. Merietza Haakmaat i den programa Merceé na kanal 11 i por a skucha nan den e programa Jolly Zone na Telecuracao FM serka sra. Scarlet Zalm. Aparte di tur esaki, nos partisipantenan pa Miss Curaçao Teenager 2014 a tuma parti na diferente aktividat sosial manera entre otro un dia kultural serka sra. Dinah Veeris, nan a hasi un bishita na Restorant Al Rancho de Alex, nan a disfrutá inmensamente di un Sunset Boattrip riba Pelican Express i a partisipá den e proyekto di ‘Bumper stickers’ di CBA television entitulá “I love CBA”. Mientrastantu e tim di IBFF ta trahando duru riba loke mester bira e último tokenan pa e anochi final di Miss Curaçao Teenager 2014 “WELCOME TO OLYMPIA”. Karchinan pa e anochi final aki ya ta optenibel na balor di 75 Fls. pa e sekshon VIP i 40 Fls. pa e sekshon general. Bo por buska dibo na Samsom, na kantor di IBFF na World Trade Center (688-1103 òf 510-6808) i serka kada partisipantenan individual. Pa keda na altura di tur akontesimentu rondó di e sertámen final i e preparashonnan ku ta tumando lugá, kòrda “like” e página di Facebook di Miss Curaçao Teenager. E página aki ta wòrdu aktualisá kontinuamente ku tur informashon importante tokante i potrètnan di tur e charla i aktividatnan na kual e partisipantenan di e aña aki ta tuma parti na dje.