‘Visionary Excellence Award’ na Myrna Jansen-Feliciano y a rindi homenahe na Simon Oduber Jr. (q.e.p.d.)

Oranjestad, November 2015 – Aruba: Durante e celebracion di Aruba Convention Bureau (ACB), cu a tuma lugar recientemente, a duna reconocimento na dos visionario cu a hunga un rol clave den establece e mercado cu awe cu ta representa aproximadamente 20% di turismo for di Merca y cu ta creciendo for di Latino America.

Myrna Jansen-Feliciano a ricibi e reconocimento den forma di un ‘Visionary Excellence Award’. Alabes a conmemora Simon Oduber Jr. (q.e.p.d.) y a duna honor na su famia den forma di un recorido riba video di e trabaonan pionero di Simon.

Mas cu 20 aña pasa un grupo di visionario a uni, encurasha pa e entusiasmo y persuasividad di Simon Oduber Jr. (q.e.p.d.), cu e obhetivo di aumenta e mercado di incentivo pa Aruba. Gobierno y sector priva a uni nan esfuerzo. Aruba no tabatin ni un centro di convencion, pero asina mes a bira e prome pais p’afo di Merca pa gana e ‘bid’ pa ta anfitrion di SITE University, un conferencia masal di profesionalnan cu ta cumpra viahe incentivo y ta organisa e viahenan aki pa nan cliente.

Cu e slogan ‘Eat your peach on the beach’, combinando un look tropical chic cu e alegria cu ta ‘trademark’ di Aruba, e team di Aruba Tourism Authority y Aruba Hotel and Tourism Association a logra gana e bid y a cuminsa prepara pa ta anfitrion di un di e eventonan pa V.I.P. mas grandi cu e isla a yega di conoce.

E team chikito, pero dicidido, bao liderazgo di Simon Oduber Jr. y Myrna Jansen-Feliciano a logra pone nomber di Aruba riba e mapa di negoshi incentivo na un forma grandioso. Te dia di awe, SITE University Aruba ta wordo menciona como un gran ehempel pa otro destinacionnan. Cu e exito di e SITE University aki, e organizacion di SITE internacional a nomina Myrna Jansen-Feliciano pa un reconocemento.

E mesun aña, DIARIO tambe a nombra Myrna Jansen-Feliciano como WOMAN OF THE YEAR pa, entre otro, e ehecucion exitoso di SITE University.

Myrna Jansen-Feliciano ta insisti cu e partnership entre sector publico y sector priva, a logra cu Aruba a wordo representa door di un team solido cu tabata necesario pa e exito di e evento y strategia pa cu e mercado aki.

Myrna Jansen-Feliciano sigur un pionero den turismo a ocupa diferente funcionan na Aruba Tourism Authority; na Miami, New York y Aruba. E tabata Director di e Departamento di Relacionnan Publico, Director General di e entidad (prome director femenina) y a fungi despues como ‘Senior Advisor’ pa Ministerio di Turismo pa 5 aña largo. Su pasion, compromiso y gran sabiduria a contribui na e exito di e industria di turismo y tabata instrumental pa e posicionamento di Aruba como un destinacion exitoso den e segmento MICE.

Su lema ta ‘Un Aruba dushi pa biba, ta un Aruba dushi pa bishita’ reflehando riba e importancia pa un desaroyo balansa y un calidad halto di bida pa esnan cu ta biba riba e dushi pida baranca aki. El a lidera diferente proyecto significante cu a enfoca riba Aruba su hendenan, cu ta e recurso mas precioso cu nos isla tin. “Happiness no ta djies un slogan, pero un estilo di bida, un actitud mental y un reconocemento personal di tur nos logronan y bendicionnan y e deseo pa haci otro feliz, tanto esnan cu ta biba akinan como esnan cu ta bishita.”

Myrna Jansen-Feliciano ta sigur un role model y un inspiracion pa hopi persona cu a traha bao di su guia. Como lider semper el a motiva su team, teniendo na cuenta nan habilidadnan y gana di siña, inspirando nan pa duna e miho di nan pa nos isla.

ACB a entrega e reconocimento na Myrna Jansen-Feliciano den forma di un escultura den brons crea pa e artista Ciro Abath. E escultura ta representa e mata di mangel den diferente fase di su desaroyo: un mangel cu ta desaroya for di mata chikito pa e mata na flor y e fruta cu ta simbolico pa e ciclo di bida, e ciclo di carera y e continuidad di desaroyo.