WILLEMSTAD- Djasabra dia 12 di Yüli último a tuma lugá den Exhibition Hall di WTC e tan antisipá sertámen final di Miss Curacao Teenager 2014. E anochi aki tabata entitulá “Welcome to Olympia” i tabata un anochi sumamente bunita kaminda un i tur por a disfruta di un show na nivel profeshonal ku a kana di forma sublime. Sin duda algun, por bisa ku despues di 6 luna di trabou duru, sakrifisio i esfuerso, tim di International Beauty and Fashion Foundation (IBFF), mayornan i partisipantenan por a kosecha e fruta. Kada presentashon tabata un delisia pa e mirada i tabata bisto ku kada un di e partisipantenan a duna tur ku tin pa konkistá e titulo maksimo. Tabatin entre otro un presentashon uniformá, presentashon den trahe di baño, dos sekshon di pregunta i tambe presentashonnan den trahe di gala. Delaster un di e presentashonnan tabata tin un toke diferente i kada un a wòrdu ehekutá di forma masha bunita. Durante di e trayektoria di 6 luna ku e partisipantenan tin tras di lomba kada un a bin ta akumulá puntuashon pa entre otro nan disiplina, e proyekto  ku kada un a hasi pa komunidat etc. Tur e puntonan aki a subi huntu ku e partisipante riba esenaro djasabra último. Despues di e prome ronda di presentashonnan i despues di a konta i agrega e puntuashonnan akumula riba e anochi final aki, tur kos tabata kla pa menshona ganador di tur e diferente titulonan i pa saka e 4 finalistanan ku lo a pasa pa ronda final.E titulo di Most Dynamic 2014 i Miss Popularity 2014 a bai pa Kimberly Fernandes, Miss Amity 2014 a bai pa Chris Anthony, Mynesha Reinita a hiba e titulonan di Miss Internet and Social Media 2014 i Beauty for the Community 2014 (Best Community Project), titulo di Most Disciplined 2014 i Most Elegant 2014  a bai pa Rachel Biere, Elainy Rojer a logra konkista e titulo di Miss Photogenic 2014 i Seline Winkel a gana e titulo di Miss Jolly Zone 2014. E kuater partisipantenan ku a pasa pa e ronda di semifinal tabata Seline Winkel, Chardonnay Verdaasdonk, Kimberly Fernandes i Mynesha Reinita. Despues di un di 2 ronda di pregunta i puntuashonnan nobo, kuerpo di hurado a skohe Chardonnay Verdaasdonk, Seline Winkel i Mynesha Reinita komo e tres finalistanan. Despues di un ultimo presentashon di e tres finalistanan e resultado final tabata konosí. Chardonnay Verdaasdonk a keda koroná komo 2do finalista Miss Curacao Teenager 2014, Seline Winkel a resulta komo nos 1e finalista i Mynesha Reinita a wòrdu koroná komo nos Miss Curacao Teenager 2014. Un kaluroso pabien na kada un di e finalistanan di parti di tim IBFF, awor e trabou mes ta bai kuminsa. Pabien tambe na kada un di e demas partisipantenan pa e tremendo trabou ku boso a hasi i pa un stap mas ku boso a dal den direkshon di boso propio adelanto. Sin boso tur, lo no tabatin Miss Curacao Teenager 2014.  Danki na kada un di nos spònsernan ku a depositá nan konfiansa den e trabou duru ku tin tras di Miss Curacao Teenager un biaha mas. Boso sostén tabata indispensabel. Ya preparashonnan a kuminsa pa Miss Curacao Teenager 2015 ku lo karga e titulo di “A night in India”. Pues keda pendiente!