Record label Hulandes ta lansa digi-album di Dibo D i Randal Corsen

WILLEMSTAD – Despues ku a lansa tres kansion di e proyekto Muzik Sin Barera riba merkado lokal, djabièrnè awor lo lansa e promé ‘digi-album’ di Dibo D i Randal Corsen internashonalmente. Banda di e piesanan Willemstad, Lanta bèk i Danki, ku tur tres a zona bon na nos radio-emisoranan, e album lo konsistí di tres piesa mas, entre nan dos poema di Dibo su abuelo Bèti Doran poné riba muzik, i un vershon impreshonante di Tòg Mi Sa, e bolero lokalmente hopi gustá di e legendario kanta-outor Rudy Plaate.

For di momentu ku a lansa e promé piesa di Muzik Sin Barera, e proyekto aki a hala atenshon pafó di nos fronteranan tambe, i esei a pone ku e record label ZenneZ Records a firma un akuerdo ku Dibo i Randal pa publiká nan kansionnan riba merkado internashonal. Mas di e kas diskera: ‘ZenneZ Records is an independent label based in the Netherlands, with a catalogue that contains albums from some of the best Dutch (and related) musicians and bands with a growing international reputation. And it spans different genres from fusion to modern creative, jazz rock to world/global, funky groove to vocal.’
Djabièrnè awor lo lansa Muzik Sin Barera den forma di un ‘digi-album’ (album digital) riba e medionan digital di muzik i di streaming, pero ya por ‘pre-order’ e album riba Spotify. Ku e lansamentu di e digi-album aki Dibo i Randal ta duna kontinuashon na nan meta pa pone muzik artístiko di Kòrsou riba mapa internashonal. Despues di e album aki, e intenshon di e kompania diskera ta pa lansa un siguiente digi-album di Dibo i Randal, i finalmente lansa un album físiko kompleto ku lo konsistí di piesanan di tur dos digi-album kombiná. Relashoná ku esaki Dibo i Randal lo drenta studio pronto atrobe pa graba produkshonnan nobo. Pa por realisá esaki nan por konta un biaha mas ku sosten finansiero di Prins Bernhard Cultuurfonds Caribisch Gebied.
Anteriormente kaba produkshonnan di Muzik Sin Barera a krusa frontera: asina a estrená e tema Willemstad den e dokumental ‘Chopin. Caribbean Key’, ku ta un produkshon Polako ku a haña nominashon pa un premio prestigioso na Italia.