WILLEMSTAD – Direktiva di AMAK durante último dianan i siman ku a pasa, ta den kombersashon intensivo ku funkshonarionan di MEO i SOAW, relashoná ku e situashon ku tin aktualmente pa motibu di Covid 19.

Un situashon delikado, frustrante, kaminda un i tur mester ta dispuesto pa hasi sakrifisio te na momentu ku e situashon normalisá. Covid 19 a sorprendé mundu hinter i Kòrsou no ta un eksepshon.

Awor aki nos ta kere ku no ta e momentu adekuá pa bai analisá kosnan ku por a bai mihó, pero nos mester fiha tur nos atenshon nos ta bai enfrentá nos futuro.

Direktiva di AMAK ta konsiente ku bou di nos artistanan no ta tur kumpli ku tur normanan atministrativo, ku ta bálido pa por funshoná den nos komunidat. Pero awor a yega e momentu ku pa awor en adelante nos ban hasi e kosnan manera mester ta.

Un realidat ta ku hopi di nos músikonan i artistanan ta pasando den momentunan hopi difísil, espesialmente esnan ku ta dependé 100% for di entradanan di músika i arte. Ta pa e motibunan aki tambe, direktiva di AMAK ta hasiendo su máksimo esfuerso pa den kòmbersashonnan ku outoridatnan, yega na areglonan ku por suavisá e dolor eksistente.

Den kuadro di esaki, AMAK mester menshoná ku di parti di MEO i di SOAW, bou di kordinashon di Sra. Janice Welhous, nos ta risibiendo tur koperashon pa yega na un  solushon, ku por suavisá e momentunan difísil aki.

Direktiva di AMAK tin komprenshon pa e echo tambe ku no ta tur nos músikonan i artistanan tin e habilidat pa manehá un kòmpiuter i ta pa e motibu ei tambe Sra. Welhous tei pa duna asistensia tékniko na esnan ku ta deseá esaki.

Ta bon pa nos realisá si ku pa luna di aprel 2020, lo kompensá nos músikonan i artista ku a registrá, ku e intenshon ku den e dianan ku ta sigui, kaba di regla tur e dokumentonan rekerí manera entre inskribí na Kama di Komersio etc etc.  Aki tambe ta bon pa menshoná ku e Registrashonnan aki lo no tin gastunan finansiero, ya ku MEO lo kubri esakinan.

Resumiendo:

E kompensashon finansiero na esnan ku a registrá kaba ta bai tuma lugá pronto, pero ta bon pa tene na kuenta ku Gobièrnu  ta eksigí pa e registrashon i entrega di dokumentonan ta tuma lugá pa por  bini na remarke pa e kompensashonnan finansiero den futuro.

Por último, direktiva di AMAK ke hasi un apelashon na músikonan i artistanan, pa si nan ke mas informashon, nan por tuma kontakto libremente ku Sra. Janice Welhous na 522-8872.

Tambe direktiva di AMAK kier a gradesi Minister Giselle Mac. William i Minister Hensley Koeiman, kendenan sigur tin atenshon pa nos musikonnan i ku a krea posibilidat pa musikonan i artistanan ptambe por bini na remarke pa un komepnsashon finansiero.

Direktiva ta deseá tur músiko i Artista hopi forsa durante di e temporada difísil ku nos ta aden i  kaminda por hasi uso di bo tempu pa enrikesé bo konosementu musikal, pa medio di formanan digital.

Atentamente

Direktiva di AMAK