Willemstad – be.advancement den kolaborashon ku Youth Vision 5000 (YV5K) ta ofresé 300 hóben, ku a partisipá na e workshop Hóben Òn! un mundu di eksperensia úniko. Djasabra 3 di sèptèmber lo transformá Kurá di Arte den un esena ku presentashon di guest star Shirma Rouse, kompañá pa Ronle Rouse i friends. Lo bai tin aktuashon tambe di kantante Shelomi Bakhuis, aktor i rapper Jeffery Tromp i artistanan di Excel Arts Academy i Danzarte. Esaki bou di direkshon di Rolison Peny aka RSP i Ian Sillé di HelpR. Jeffery lo simulá bida di un hóben ku a pasa den eksperensianan di bida. Atraves di e Musical Seminar Hóben Òn! e hóbennan ta drenta den kontakto tambe ku otro hóben (adulto) ku a logra nan meta apesar di tur turbulensia den nan kaminda. E Musical Seminar ta tuma lugá di 9’or di mainta te 2’or di mèrdia.

E proyekto Hóben Òn! ta konsistí di 3 fase.  Fase 1 Workshop Soño i Talento, Fase 2 Musical Seminar i  Fase 3 Scholarship. Tambe lo traha un dokumental di henter e trayekto. Meta di e proyekto ta pa yuda e hóbennan deskubrí nan soño, talento i potensialnan pa nan logra nan metanan den bida. E proyekto ta un inisiativa di Bianca Neman di be.advancement i YV5K a adoptá esaki mirando ku e meta ta pas kompletamente ku nan meta di nan fundashon. E promé siman di sèptèmber lo bai tin hopi atenshon na Curaçao North Sea Jazz pa adultonan. P’esei mes e fecha di 3 sèptèmber ta unu ideal pa e hóbennan tambe bini den kontakto ku artistanan grandi lokal i internashonal ku tambe ta presentá na festival i shownan internashonal i ku artistanan grandi, a yega di gana premio, produsí diferente CD, a haña rekonosementu i ta representá Kòrsou den eksterior.

E mainta no ta keda na un musical so pero ta duna e hóbennan oportunidat di skucha ‘succes stories’ di profeshonalnan yòn eksitoso ku ke empoderá e hóbennan pa semper perseverá. Un kantidat di 7 persona a aseptá e invitashon pa bin duna un workshop. Ta trata di Andy Krishner di 2nd life ku Desaroyo Personal, Wesley Eleonora di SIM ku Desaroyo Profeshonal, JCI IOBA Curaçao ku Liderazgo, Igmar Comenencia di Kuki Mònster ku Entrepreneurship, Alton Paas ku Ekipando bo mente, Deva-Dee Siliee di Curaçao Cares ku Change Makers i un eksperto ku lo duna konseho riba Estudio avansá. Kada motivational speaker lo konta di nan eksperensia personal i e balor di eskoho ku nan a pasa den pa yega kaminda nan ta. Balornan klave i abilidatnan nesesario pa logra den bida ta entre otro tópikonan importante ku nan lo trata. Lo repartí e 300 hóbennan den e 7 workshopnan. E hóbennan ta skohe tambe 2 for di un kantidat di 14 workshop ku lo kontinuá despues di e Musical. Ta trata di Kanto: Shirma Rouse, Rap: RSP, Músika i Beat: Ronle Rouse, Baile Kontemporáneo: Simia Foundation, Brassband, Drama i Streetdance: Excell Arts Academy, Traha instrumènt: Sorandy Sint Jacobs, Efekto di Lus: Ian Sille di HelpR, Filmashon/drone: Pito Polo, Sirko: Danzarte i tambe lo tin ekspertonan riba tereno di  Arte Plástiko, Fotografia i Diseño gráfiko. Durante e dia lo tin tambe un marshe di informashon spesial pa hóbennan.

Via nan dosente, lider òf coach  e hóbennan ku a partisipá na Fase 1 ta haña un formulario pa skohe entre 2 workshop ku lo duna 3 di sèptèmber. Ta supliká tur hóben ku a kambia skol i no a haña e invitashon ainda pa mail nan informashon na  musicalseminar.hobenon@gmail.com òf tuma kontakto ku nan mentor di e skol ku nan tabata bai. E workshop di Fase 1 ta on-going, esta na tur momentu un organisashon por aserká fasilitadó pa organisá e seshon aki, ku alabes ta stimulá mihó ambiente i trahamentu den tim i logro nan meta personal i esun di e organisashon. Hóbennan ku partisipá na Fase 1 ta bini na remarke e ora ei pa e Musical Seminar di otro aña ya ku esaki ta un evento anual. Pa mas informashon por tuma kontakto ku Bianca Neman na 512-2440. be.advancement i YV5K ta gradisí tur organisashon i personanan ku a pone nan mes disponibel pa krea un eksperensia inolvidabel pa e hóbennan. Ámbos organisashon tin un plan di mas aña pa garantisá durabilidat di e trayekto ku a start via e proyekto Hóben Òn!