WILLEMSTAD – Riba Dia di Rei Museo di Punda lo rifa karchi gratis pa e konsiertonan di Curaçao North Sea Jazz Festival. En total tin seis karchi disponibel: dos pa kada dia di e evenemento. Tur hende ku paga e entrada di Museo di Punda riba Dia di Rei ta haña un lot ku por uza pa gana un di e seis karchinan. Lo anunsiá e ganadonan Djamars 28 di aprèl riba e Facebook di Fundashon Punda Then and Now (www.facebook.com/punda2014).

Museo di Punda na Hanchi Snoa 1-5 (parti patras di Gomez Plein) lo habri di 7.30’or am te ku 5.30’or pm riba Dia di Rei (Djaluna 27 di Aprèl). Bishitantenan por disfrutá di e eksposishon permanente ‘La Boutique del Caribe’, i di dos slide show ku ta duna un bista riba e kambionan den Punda durante e último 100 añanan. Tambe por wak e Maketa di Punda ku spesial pa Dia di Rei ta kompletamente dorná den oraño. A uza 75 mèter di crêpepapier den dos koló di oraño pa dorna e edifisionan di e maketa ku bandera i flornan. Pa e mesa riba kua e maketa ta pará Ackerman Punda a kontribuí ku un tela di mesa oraño-oraño. E kuratòr di e museo Jorge Cuartas lo ta presente riba Dia di Rei pa kontestá preguntanan di bishitantenan di e museo.

E karchinan gratis pa e festival di jazz ta posibel dor di un kontribushon di CNSJF. Tin dos karchi disponibel pa konsierto di Djabierne 4 di september, dos pa e konsierto di Djasabra 5 di september i dos pa e konsierto di Juanes/Oscar de Leon di Djawèps 3 di september. Lo saka e ganadonan riba Djamars 28 di aprèl bou di ouspisio di un notario. Pa partisipá tin ku paga e entrada di naf 8.00 na Mueso di Punda i yena un formulario ku nomber, adres, telefon, email i number di sedula.

Pa mas informashon por yama ku Museo di Punda: 465-2992