WILLEMSTAD – Museo di Punda ta sali for di sentro di suidat. Gastunan di eksplotashon den Punda ta muchu haltu i e kantidat di hende ku ta bishitá Punda ta muchu chikí. Den su promé seis luna di eksistensia e museo no a logra di haña sufisiente finansiadó ku ke para tras di e proyekto. Pesei Direktiva di Fundashon Punda Then and Now awo ta buskando un lugá pafó di suidat.
Un evaluashon di e sifranan ta mustra ku 1,416 persona a bishitá e Museo di Punda den e promé seis lunanan. Den 70% di e kasonan (997 persona) e bishitantenan tabata hende lokal. Di e turistanan ku a bishitá e museo (419 persona) 82% tabata pertenesé na e grupo di stay-over-tourists. 45% di tur e bishitantenan a bin Punda spesial pa e Museo di Punda. Ku eksepshon di dos persona tur hende tabata sumamente entusiasmá ku Museo di Punda.
Direktiva di Fundashon Punda Then and Now ta laga sa ku “e sifranan bunita aki ta mustra klaramente ku Museo di Punda tin derecho di eksistí, i ku ta trata di un inisiativa ku e bishitantenan, tantu hende lokal komo turista, ta karga”. E Direktiva ta konstatá ku na e momentu aki situashon den Punda ta hopi krítiko i ta wordu karakterisá dor di kada dia menos bishitante. A base di e sifranan di Museo di Punda, e Direktiva ta kere ku situashon den Punda lo por mehorá ku mas atrakshonnan kultural. “Pero mester di mas tempu i sén pa logra esaki”, asina Jorge Cuartas, presidente di Fundashon Punda Then and Now ta bisa.
Cuartas ta konstatá ku e kantidat di hende ku a bishitá Museo di Punda lamentablemente no tabata sufisiete pa kubri e gastunan fiho. Dor di esei no pora sera é presupuesto. Konversashonnan ku bankonan i ku otro stakeholders pa yega na un solushon finansiero te dia di awe no a duna e resultadonan deseá. Pesei lo evakuá e edifisio na Hanchi Snoa 1-5 den kua Museo di Punda a establesé su mes pa e promé seis lunanan.
“E úniko opshonnan real riba mesa na e momento aki ta pa establesé e Museo di Punda na un lugá pafó di Punda”, Cuartas ta bisa. “Entre otro Sambil a ofresé nos un unit na un lugá ku high traffic ku kondishonan finansiero hopi agradable.” Cuartas ta laga sa ku su Direktiva ta opiná ku establesé Museo di Punda pafó di Punda ta “apsurdo” pero ta ripití ku sin sosten di finansiadó i otro stakeholders no tin otro solushon.