Cura Doet a selebrá su di 10 lustro e aña aki i riba e dianan 10 y 11 de mart ta tin un gran fiesta den Nieuw Nederland, kaminda e proyekto di voluntario más grandi  den Reino Hulandes a wòrdu ehekutá dor di organisashonnan sosial. E slogan di e aña aki di Cura Doet ta ‘Dun’un man, gan’un Kurason!’

Beyond Kultura Events Foundation (BKEF) di Sint Maarten a uni forsa ku Changing Habits Foundation di Curaçao pa ehekutá dos proyekto komplementario den Nieuw Nederland (NN), un bario ku karakterístiko multikultural situá na e banda ariba di Willemstad.

Un parti un poko dekaí di e bario a wòrdu limpiá pa miembronan di famia, amigunan i bisiñanan. I ku apoyo durante e fiesta, voluntarionan di First Caribbean Bank a yuda. E lugá a wòrdu transformá den un lugá limpi, kaminda hóbennan por risibí un mensahe positivo di grandinan den e bario.

E muralista Aemy Felicia-NiñaFeliz a inmortalisá un di e habitantenan Adelaida Morales, ku a fayesé ku kasi 102 aña di edat, ku un presioso mural den Den Helderstraat, Nieuw Nederland. Ku su yerbanan natural y orashon, e la kura diferente famianan, amigunan I habitantenan lokal.

Su ñietu, Loekie Morales, presidente di BKEF, ta bisa: “uza nos podernan y balornan positivo pa sirbi nos komunidat I bolbe bèk na nos naturalesa ta mensahenan general di e mural akí”.

Rita Aikman, tesorero di Beyond Kultura informá: “E mural akí, ta e di promé di un seri di mural ku e Fundashon Beyond Kultura tin plan di logra den I rònt nos  suidat di patrimonio kultural, Willemstad, rekonosé dor di UNESCO”.

E kantante Veanira Reed, a habri e fiesta ku nos himno nashonal I kansionnan di alabansa.

Baluartenan di e bario manera Esther Hooi, ex presentadó di radio y televishon i Dr. Maria Liberia Peters, ex-minister presidente di Antias Hulandés, a papia di su hubentut den e bario.  Mr. Ruthmila Larmonie- Cicilia, aktual Minister di Desaroyo Sosial I di labor (SOAW) a elaborá riba e maneho di gobièrnu pa barionan. Etienne La Cruz, promé ñietu di Adelaida Morales, a inaugurá e mural. Outor i ñietu drs. Loekie Morales i su bisa- ñietu Faina Cathalina a papia di e nifikashon di e matriarga akí den nan bida.

E artista  Aemy Niñafeliz a papia di su proseso di konosé sra Adelaida Morales atraves di e historianan ku e generashonnan a kont’é, pa por a pinta e mural.

Un danki ta bai pa organisashon Cura Doet i tur famianan,ku a kontribuí finansieramente . Tambe na tur voluntarionan di First Caribbean Bank I tur e habitantenan, kende nan a yuda I apoyá e proyektonan akí pa yuda hasi nos Kòrsou más bunita.