Komo parti di CuraDoet i su selebrashón spesial di su di 10 lustro e aña akí, Beyond Kultura Events Foundation (BKEF) di Sint Maarten i Changing Habbits Foundation di Kòrsou ta bai inaugurá djasabra awor 11 di  mart den e bario di  Nieuw Nederland (NN), na e plenchi  den Den Helderstraat, un  bunita mural . Esaki ku yudansa  di artista i muralista Aemy Felicia. E habitantenan di Nieuw Nederland, e invitadonan i prensa tur ta invitá pa nos selebrá.

E programa ta kuminsá 12:00 or ku nos himno nashonal i  orashon. Siguí pa 12:15 or ku introdukshón di e tema di e mural, ku anékdotanan di baluartenan di Nieuw  Nederland  kon nan a lanta den e bario. Siguí pa e outor Etienne La Cruz, ken a nanse 77 aña pasá den NN i ku lo inaugurá e mural. E propósito di e mural ta pa honrá nos grandinan di NN, pa nan bon edukashón ku nan a duna nos.

Nos a invita algun di nos baluartenan di NN, por ehèmpel ex-minister president María Liberia Peters, pa konta nos kon nan a lanta den e bario ey.

Despues di e parti ofisial lo intervistá algun di nos grandinan den bario i kontinua ku ambiente di musiká di kaha di orgel I grupo di baile. Lo baila un tiki ku nos grandinan . Nos residentenan  di antes i di awor, i invitadonan por disfrutá di nos folkor, nos músika, un bebida i algu di tene boka kontentu, te ku 2:30 di mèrdia.

Loekie Morales, presidente di Beyond Kultura Events Foundation, ta bisa: “E mural aki ta e prome di un seri di muralnan ku BKEF ke logra den I rond nos siudat Willemstad, ku ta un patrimonio kultural rekonosé pa UNESCO. E mural ta simbolisá e forsa di nos hende muhénan, komo kriadónan di nos familianan, ku norma i balornan positivo. Nan ta sigui hunga un ròl sumamente importante den edukashón di nos komunidat”.

E señora riba e mural ta Adelaida Morales, ku a biba te ku su kasi 102 aña di edad. E la duna luz na 6 yu den Nieuw Nederland I a mira mas o menos 35 nietu nance den e bario aki. Nan tur e la lanta ku e refran:  ‘Esun ku hasi bon, Bon ta P’e’ i tambe ku Salmo 23.

Un danki enorme ta bai na CuraDoet y familianan, ku ta e motornan finansiero ku tambe ta kere den e proyekto bunita aki, ku kual nos ke radia Positivismo y krea lugarnan di enkuentronan gezellig na na nos dushi Kòrsou.