WILLEMSTAD – Despues di a funshoná kasi 30 aña for di World Trade Center (WTC), entrante awe e mudansa di The Trader Catering pa Landhuis Brakkeput Mei Mei ta un echo. For di e sitio nobo lo kontinuá ku e aktividatnan di catering manera semper tabata e kaso. E restorant The Trader den WTC si a sera definitivamente.

Komo motibu di salida for di WTC por menshoná e mantenshon kambou di e edifisio i e fasilidatnan, e kehonan bon konosí enkuanto èrkonan defisiente i e éksodo general, motibu pa kua e kantidat di kliente den e restorant tambe a mengua proporshonalmente. Tin un redukshon fuerte tambe di e kantidat di evento, manera bolsa, konferensia, etc. durante e último añanan. E deliberashonnan difikultoso tokante e desaroyonan aki a kondusí na relashonnan muchu mas friu ku e doño di WTC. Komo ku no tin perspektiva riba kualke mehorashon den e situashon aki, e empresa Horex a disidí pa entrante dia 31 di yanüari 2019 sera e restorant The Trader den WTC definitivamente. Ya anteriormente a kuminsá ku desmantelashon i mudansa di e The Trader Catering pa e alohamentu nobo na Brakkepoti. Aya lo establesé tambe e ofisina di benta pa e servisionan di catering.

Trasladonan

Seramentu di restorant The Trader a konmové direktor Tony Halabi. E mes tin ya 45 aña trahando den sektor di horeca i den kurso di añanan el a organisá den WTC mas di 75 evento grandi, manera bolsa, eksposishon i konferensia ku kada un di nan a atraé míles di hende pa e lugá. Loke mas ta molesti’é ta e destino di e personal; hopi di nan tin hopi aña leal na e empresa. E empleadonan mes a ripará hopi tempu kaba ku ya e lugá no tabata drei bon mas a konsekuensia di un atraso formal di e kantidat di aktividat i un retraso grandi pa loke ta mantenshon di e edifisio di WTC i otro fasilidatnan. Gran mayoria di e empleadonan por a trasladá pa otro sekshonnan di e grupo di horeca. Es desir, Horex ta manehá tambe restorant Landhuis Brakkeput Mei Mei i tur loke tin mará n’e, e sentro di evento Klein Kwartier i e playa di Cas Abou. Ku 4 empleado ku a bira supérfluo a yega na den bon entendimentu den forma di un areglo di retiro.

Bou di e sirkunstansianan nobo The Trader Catering entrante febrüari 2019 por ta na servisio atrobe manera semper di kliente tradishonal i nobo den organisashon di fiesta i otro evento.