En conexion cu Dia Mundial di Medio Ambiente

ORANJESTAD, Aruba – 7 di Juli 2018: Riu Palace Aruba a organisa nan evento di planta mata en conexion cu Dia Mundial di Medio Ambiente pa yiunan di huespednan. E muchanan a reuni cu e empleadonan di RiuLand y a pasa un rato agradabel cu e mascota di RIU, esta Calú.

Dia 5 di Juni tabata dia mundial di medio ambiente y Riu Palace Aruba a pasa un dia sin contaminacion di plastic cu e muchanan, unda a siña e muchanan con pa planta mata den un baki y con pa cuida esaki. E muchanan tabatin un sonrisa grandi na nan cara y specialmente cu nan por a diberti cu Calú.

Na final e muchanan a ricibi un regalo chikito for di Riu Palace Aruba, cu tabata un potlood recicla di palo. Tanto e muchanan como e mayornan a keda contento di e regalo ricibi y a gradici e empleadonan di RiuLand pa siña e muchanan riba plantamento di mata. RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.