‘Magical Christmas Toy Drive’ tabata mágiko di bèrdat!

WILLEMSTAD – “Nos ta masha agradesido na komunidat ku a yuda nos pa realisá nos promé ‘Toy Drive’. Di e manera aki Renaissance Curaçao Resort, Carnaval Casino i Wind Creek Hospitality ta deseá di kontagiá Kòrsou ku e vibrashon navideño, kòrdando tur hende riba e esensia di Pasku dor di kompartí ku otro. Nos a hasi esaki ku hopi amor pa e muchanan di Kolegio Santa Famia i ta spera ku nan disfrutá di nan regalo e fin di aña aki”, esaki di akuerdo ku sra. Heidi Foendoe, Carnaval Casino General Manager.

Tabata djaluna mainta ku muchanan di Kolegio Santa Famia a risibí un bunita sorpresa, nan no por a kere nan bista ora nan a mira e kantidat inmenso di ko’i hunga den hal di nan skol. Entre gritu di alegria i entusiasmo pa skohe nan ko’i hunga preferí, sr. Angelo Martes – Human Resource Director a hasi entrega ofisial di e gesto bunita aki. “Ta imposibel hasi un gesto asina grandi nos só, komunidat di Kòrsou a skucha nos yamada i a kumpli. Tur nos koleganan di Renaissance Curaçao Resort i Carnaval Casino a aportá grandemente. Nos a entregá e regalonan ku un kurason yen di gratitut i ta spera ku otro aña nos por bolbe konta ku e sosten”, asina sr. Angelo Martes – Human Resource Director a terminá.

Komo gratitut Renaissance Curaçao Resort i tambe Carnaval Casino a rifa un sena pa 2 persona, entre tur ku a hasi e donashon di un ko’i hunga. Masha pabien ta bai na Sumit Punjabi. Riba fotonan athunto por haña un impreshon di djaluna mainta dia ku a hasi entrega di e regalonan na Kolegio Santa Famia. Renaissance Curaçao Resort, Carnaval Casino i Wind Creek Hospitality ta deseá henter pueblo di Kòrsou felis dianan di fiesta!