ORANJESTAD, Aruba – November 2015: Algun luna pasa Lito Lacle y Liliana Rasmijn, hunto cu un grupo di colega y un sistema di apoyo consistiendo di amigonan di trabao a cuminsa cu un rutina nobo: tur diahuebs nan ta bishita e hobennan cu ta biba na Imeldahof pa brinda nan extra apoyo, cariño y amistad. E relacion entre e hobennan y Cuerpo Policial ta uno di confiansa y un respet grandi. E muchanan ta haya guia di nan amigonan polis, kende ta hasta bishita nan scol pa sigui nan desaroyo y progreso, y ta organisa actividadnan special cu ta combina recreacion y educacion.

E exito di e proyecto ta abrumador y cu hopi entusiasmo esunnan cu ta lider’e ta papia di dje. Den un combersacion casual cu Ferdinand Ponson di Brandweer Liliana Rasmijn a cont’e di e desaroyo nobo aki. Di biaha Ponson a bis’e cu Brandweer tambe ta interesa pa duna apoyo na e proyecto y esaki a resulta den un bishita di Brandweer na Imeldahof, unda cu nan a conta di nan profesion, di tur tipo di caso y a invita e hobennan pa cera conoci cu tur e detayenan di e auto cu nan a trece cu nan.

E entusiasmo di e hobennan tabata grandi y tabata parce cu no lo bin un fin na nan preguntanan. E “winning moment” tabata ora cu e hobennan a wordo invita pa muha e matanan den hardin di Imeldahof uzando e slang pa paga candela y e ora cu Rasmijn a pasa man pa e slang, bira y muha tur e muchanan. Ponson a laga sa cu awo e tambe, hunto cu Brandweer lo sigui cu Polis den e proyecto aki y lo ta bishitando Imeldahof cu nan otro autonan, pero tambe lo forma un team di futbol di Brandweer pa train cu e muchanan regularmente.

Banda di diberticion y alegria, e mensahe cu Cuerpo Policial ta trece pa e muchanan ta cu nan mester haci nan best na scol, nan mester comporta nan mes bon den comunidad. Pa medio di invita diferente huesped pa comparti informacion cu nan, nan ta wordo inspira pa sigui padilanti cu nan scol, cu bida tin hopi di ofrece, tin hopi oportunidad den mundo y pa nan scoge un profesion cu ta haci nan sinti feliz y por ta exitoso den dje.

Ferdinand Ponson a expresa cu e muchanan a “touch” su curason y a pone realisa awo mas cu nunca cu ta tempo pa para keto , yuda y duna un man. Stop di keha di e situacion propio, pero tuma accion pa yuda otronan cu falta loke nos si tin. Brandweer tabatin palabranan di elogio y admiracion pa loke Polis a cuminsa cune y lo sigui aporta na e muchanan.

Cuerpo Policial ta hopi contento pa e bon cooperacion cu nan ta ricibi cu e proyecto aki, mas ainda ora cu otronan kier  uni na e esfuersonan pa brinda un bon guia na e hobennan. Despues di algun luna di bishitanan na Imeldahof, intercambio, bishitanan na scol, e confiansa entre e muchanan y e miembronan di Cuerpo Policial a crece hopi. Liliana Rasmijn ta expresa cu nan a cuminsa na simbolicamente adopta e muchanan di Imeldahof y esaki ta resultando den bunita amistadnan y un grupo di mucha cu ta sinti nan mes cada dia mas sigur di nan mes cu ta sinti cu nan no ta nan so, pero tin mas hende y mas hende cu ta pendiente di nan.

Rasmijn a agrega cu nan ta hopi contento cu e expansion di nan team, cu Brandweer ta bin uni cu nan, y cu e intencion ta pa topa cu mas hende den diferente ramo cu tambe lo kier contribui na e muchanan.

Muchanan ta e futuro di Aruba y cada mucha tin su storia; cu guia y cariño nan situacion ta mehora, nan ta wak cu tin un bunita futuro, nan ta wak pakico nan mester comporta miho, pakico nan mester haci nan best na scol y pakico nan tin amigonan polis cu ta pasa scol y controla cu nan cabesante y maestro unda cu nan mester di mas yudansa of apoyo.

Tur diahuebs miembronan di e team di Cuerpo Policial ta bishita Imeldahof y ta invita tur otro departamentonan interesa pa contribui cu un lezing of un demostracion pa tuma contacto cu e team di comunicacion di Polis pa pone esaki riba nan programa.