Desde mainta trempan tabata warda e yegada. Actividad a continua riba Plaza Betico Croes

ORANJESTAD, Aruba – 19 di November 2017: Diadomingo mainta e dia spera a yega na momento cu e barco di Sinterklaas a hancra na waf. Muchanan tabata contento di a mira Sinterklaas hunto cu su Pietnan, kendenan a saluda tur mucha. Desde 10:00 di mainta hopi mucha a drenta waf pa asina warda e barco di Sinterklaas yega, unda cu nan a ricibi’e cu canticanan di bon bini.

Riba e ruta hopi mucha tabata para na banda y tabata saluda Sinterklaas y e Pietnan, kendenan tabata pasa parti mangel p’e muchanan. Tambe e Pietnan tabata saca potret cu tur hende y tabata haci show durante e ruta. Tambe Sinterklaas tabata acompaña pa brommernan di Harley Davidson te na Plaza Betico Croes.

E fiesta a sigui na Plaza Betico Croes, unda cu tabatin diferente actividad pa muchanan. Riba plaza tabatin presentacion di canto y baile di diferente grupo hubenil y infantil. Tambe e muchanan a disfruta di e kids corner, unda cu tabatin dino jump, carrousel, pintamento di cara, tentnan di dushi cuminda y refresco y hopi mas. E Pietnan a entretene e muchanan unda cu a canta y baila cu nan. Hopi mucha a saca potret cu Sinterklaas y Zwarte Pietnan.