WILLEMSTAD – Mr. Weazley ta introdusi su ultimo produkshon titula ‘Love Me Like Water’, un kantika den e ritmo di Afro-Pop, ku ta papia kon amor realmente mester keda ekspresa entre dos persona. E kantika a keda skibi pa Benjamin Thode i a ser produsi pa Pieter Beugelink, miho konosi komo e produktor hulandes BENG.
Ken ta Mr. Weazley? Kantante prinsipal Benjamin Thode, realmente ta un mucha krioyo. Ela nase na Kòrsou i a pasa su infansia na Boneiru, pa después e muda pa Hulanda, unda ela kontinúa su estudio na konservatorio Artez University. Benjamin a kuminsá presenta den diferente diskotèk na Hulanda komo MC, i después a djòin e banda di Reggae Leeways.
Na 2017, ela tuma e kurashi di sigui riba su mes i asina ela forma e grupo Mr. Weazley ku algún músiko talentoso. E grupo ta konsistí di Andrej Bragin na guitara, Amir Katevushnik riba drums, Aditya Sardjono riba Bass, Dinesh Signh riba piano, Anthony Lubbers na alt saxophone, Marius Trapp na tenor saxophone i Jelle Smit riba trompèt. Según Benjamin, hopi di e musikonan ku ta forma parti di Mr. Weazley, ta amigunan ku e konose pa hopi tempu kaba, i huntu nan a disidí di bai pa e reto aki. Tambe Benjamin ta splika ku Mr. Weazley ta un akrónimo di nan nòmber.
Plannan pa futuro Na 2019, Mr. Weazley a presenta durante varios festival di renombre na Hulanda, manera Lowlands i Zwarte Kross. “Pa presenta dilanti un públiko grandi asina ta un eksperensia inolvidabel i nos ke sigui presenta ront Europa”, Benjamin ta splika.
Tambe Mr. Weazley tin plannan grandi pa 2020, unda nan ta bai lansa algún single nobo i tambe kolabora ku algún artista di renombre. Pero promé, Benjamin ke estabelese e relashon ku e fanátiko na Aruba, Boneiru i Kòrsou, i después konkista Karibe i Merka. Después Mr. Weazley lo drenta studio pa kuminsá graba nan debut álbum, ku ta plania pa 2021.
E videoclip di ‘Love Me Like Water’ ta disponibel riba YouTube na https://www.youtube.com/watch?v=QKSxmEuB0jE i e single por keda pidi na tur radio popular riba nos isla.
Bo por siguí Mr. Weazley riba Facebook.com/MrWeazley.official i Instagram @Mr.Weazley i pa informe di presentashon, mail na mrweazley@gmail.com