WILLEMSTAD – Basista, areglista i kantante Riëdy Holder, miho konosi komo Mr. Ray Bass,  ta introdusi su ‘alter ego’ DJÈGO – e gai ku su lenga no ta para pa niun hende. Na 2017, DJÈGO a hasi su debut den farandula unda el a figura den e clip di Stanley Clementina titula ‘Kombersa Kune’. Despues di a observa farandula i e notisianan di Korsou pa largu tempu, DJÈGO no por a wanta mas i a disidi di drop su propio single ‘Sendé’ produsi pa AJ Grand i Mr. Ray Bass.

Despues di a muda pa Hulanda komo hóben ku su famia, Mr. Ray Bass a keda desaroya su talento unda ela kuminsa milita den algun banda antiano popular. Aki Mr. Ray Bass a fungi komo basista pa entre otro artistanan manera Irsais i Jon Tarifa i tambe komo musiko den e banda di Kizomba, KIZZME. Despues di tempu, e deseo pa ekspresa su propio bos musikal a bira mas fuerte i asina Mr. Ray Bass a kuminsa krea su mes komposishonnan. Su debut ela hasi algun aña pasa ku ‘Un Chens’ ku e talentoso Izaline Calister. 

Na 2019, Mr. Ray Bass a lansa e single ‘Monday Breakups’, ku ta ilustra un sabor musikal distinkto, unda generonan musikal manera hip hop, reggae, kizomba i ritmo kombina ta keda meskla. E aña aki, Mr. Ray Bass a kontinua ku ‘Phunky Reggae’, un kantika melodiko influensia pa Ska i Rub-A-Dub, ku a bira e di tres ‘Antillen Hit’ di Dolfijn FM, e radio hulandes di mas grandi di Antias i Aruba. Mr. Ray Bass semper ta buska mas avenidanan kreativo pa ekspresa su mes artisitikamente, i asina a dal den su ‘alter ego’ Djègo, unda e no ta sensura su mes riba retnan sosial.