ORANJESTAD – SeNd Productionz ta contento di anuncia cu Aruba su representantenan na e certamen masculino y femenino Mr. & Miss Hispanoamerica 2013 y Mr. & Miss Belleza Turismo Mundial 2013 ta cla pa sali pa Santo Domingo! For di anja pasa nos Mr. Aruba Hispanoamerica Sergio Winterdal ta den full preparacion pa e reto cu el a pone su dilanti: Representa su isla na e certamen masculino internacional. E certamen mes lo ta for di 5 pa 10 di Augustus 2013 aya na e ciudad La Romana di Republica Dominicana. Varios pais Latino Americano lo participa na e certamen aki, entre nan Venezuela, Puerto Rico, Republica Dominicana, Brazil pa menciona algun. Hunto cu Sergio lo biaha tambe Karol Croes cu lo participa den e categoria Miss Hispanoamerica y Paola de L’Isle cu lo participa den e categoria di Miss Belleza Turismo Mundial. Nos Mr. Aruba Hispanoamerica kier a tuma e espacio pa gradici esnan cu a sostene pa e por bai representa Aruba: K&G, Healthy Living Club, Dentista Mirto Tromp, Maggy’s, Rejuvinate Medi Spa, Jason Margarita Photography, I love Aruba, Carlos Tromp y SeNd Productionz. Tambe na e costureranan Gaby, Teresita, Greta, Adelicia y Marlene danki pa e ayudo! Na tur otro persona cu den un forma of otro tambe a yuda, hopi danki! Aruba sigur lo ta bon representa den nomber di Sergio, Karol y Paola!

Di nos parti ricibi palabranan di exito! Nos lo keda pendiente pa tur detaye!