DEN HAAG/WILLEMSTAD:- Tabata djaluna último ku e’la keda introdusí, e tema promoshonal pa e temporada aki di Monica Mao-Cheia i Teddo Juice titulá, “Nooit Meer Alleen”.  Un zouk/ kizomba kombiná ku urban ku a kai masha na agrado serka e oyente. Den un entrevista djaluna atardi den programa di Ruvette Dirksz na Radio Direct 107, Monica a duna di konosé ku esaki ta inisio di un proyekto ku e’la bin ta traha riba dje pa basta ratu; despues di e wòrdu aserká dor di Teddo Juice pa kanta e piesa aki den forma duo, e’la haña e idea genial i tabata na e momentu oportuno pa hasi esaki. Na Ulanda, Monica a start ku su mesun agrupashon musikal yamá “Sabor a Mao” ku ta dediká su mes na ‘latin grooves’ i ya kaba ta masha popular den fiestanan di salsa i bachata. E formashon musikal di Monica Mao-Cheia ya kaba tin algun piesa promoshonal riba Youtube pa tur ku ta deseá di skucha, miéntras ku e piesa nobo di Monica Mao-Cheia i Teddo Juice “Nooit Meer Alleen” ta riba SoundCloud i por wòrdu skuchá na tur radio-emisora. Por sigui e pasonan di e kantante yu di Kòrsou, Monica Mao-Cheia via di su página di Facebook.