Koperashon Mojo, TSC Crowd Management i Securitas

WILLEMSTAD – Komo e organisadó i promotor mas grandi i mas konosí di konsierto i festivalnan musikal na Hulanda, Mojo a bati na porta di e kompania lokal di seguridat Securitas pa durante seis siman na yüni i yüli duna nan sosten na Hulanda, poniendo disponibel efektivonan di seguridat pa eventonan.

Mojo ta bon konosí na Kòrsou tambe. Pa motibu di nan ekselente reputashon, ku nan a akumulá den kurso di mas ku 50 aña, Fundashon Bon Intenshon djaki pa añanan kaba ta enkargá Mojo ku ehekushon di Curaçao North Sea Jazz Festival, Blue Seas Festival i otro evento i konsierto grandi na Kòrsou – te ora Covid-19 a bin daña kos! Durante dos aña no a pèrmití Mojo organisá evento públiko grandi, ni na Hulanda, ni aki na Kòrsou.

Temporada nobo di evento
Awor ku ta pèrmití atrobe pa organisá evento, na Hulanda a nota un interes imenso pa esei i e agènda di evento ta yen di festival i konsierto grandi, manera North Sea Jazz Festival na Rotterdam, Pinkpop Festival na Landgraaf i konsiertonan hopi komentá manera esnan di The Rolling Stones i Ed Sheeran. Ya ku en bista di e kantidat grandi di evento ta difísil pa Mojo/ TSC Crowd Management haña sufisiente efektivo kalifiká di evento, nan a buska koperashon ku Securitas na Kòrsou pa temporalmente bin duna un man den e tim di seguridat na Hulanda ku kolaboradornan lokal.

Reklutashon i selekshon
Securitas i Impacto ta enkargá ku reklutashon, selekshon, guia i supervishon na Hulanda. Parsialmente e tim lo konsistí di kolaboradornan di Securitas i parsialmente di kandidatonan ku mester reklutá ainda. Esnan interesá mester ta riba 21 aña, disponé di un pasaporte, dominá e idioma Hulandes bon i tin eksperiensia den seguridat òf den e gremio di hospitalidat. Lo perkurá pa pasashi ida i buèlta pa Hulanda, estadia, kuminda i salario. E kandidatonan selektá lo haña un formashon na midí komo efektivo di seguridat na evento.