Aruba Tourism Authority orguyoso di nos hendenan Nomina den revista “Gerente” di Venezuela
ORANJESTAD, Aruba – 30 di november 2025: Den cuadro di su celebracion di aniversario, e conocido revista “Gerente” di Venezuela a publica un edicion special den cual e ta rindi homenahe special na 100 gerente mas exitoso di nos pais bisiña. Entre e 100 gerentenan exitoso ta figura Miriam Dabian, director di e oficina di Aruba Tourism Authority na Caracas, pero tambe encarga cu henter e continente Latino Americano.
Entre e nominadonan a parti e categorianan den Presidente, Gerente General, Gerente di Mercadeo, Gerente di Benta, Gerente di Finansa, Gerente di Recursonan Humano, Gerente di Operacion y Logistica, Gerente di RSE, Gerente di Comunicacion Corporativo, Gerente di Tecnologia, Exitonan den exterior y Entrepreneurnan.
E categoria den cual Miriam Dabian di Aruba Tourism Authority a gana premio ta como Gerente General.
Den su entrevista na e revista Venezolano, Miriam Dabian a duna di conoce cu promove un destino turistico por parce un trabou hopi agradabel y hasta festivo. Sinembargo, e ta un tarea cu ta rekeri hopi habilidadnan, no solamente den area di comunicacion, sino tambe den planificacion. Mester tene cuenta cu brinda servicio semper ta un tarea dificil.
Miriam Dabian ta traha pa mas di 30 aña caba pa Aruba Tourism Authority y ta e prome hende muhe pa dirigi e strategia di promocion pa e mercado Latino Americano, for di e oficina principal di A.T.A. na Caracas, Venezuela.
Miriam Dabian, siendo e director di A.T.A. pa Latino America a logra posiciona Aruba como un di e destinacionnan preferi den Caribe pa mercadonan grandi manera Argentina, Brasil, Chile, Colombia y naturalmente Venezuela! E logronan principal den e ultimo aña aki ta bisto den e cifranan, specialmente si para un rato keto na e crecemento di 34% den cantidad di turistanan yegando Aruba for di paisnan Latino Americano y un crecemento den capacidad di asiento disponibel pa Aruba for di e mercadonan Latino Americano cu a aumenta cu 29.5% compara cu e aña prome.
Miriam Dabian a admiti cu banda di tur e exitonan, tambe tin reto. Un di nan sigur ta pa sigui diversifica e mercadonan principal di Latino America. Den esey ta haciendo esfuerso cu mercadonan nobo manera ta Surnam, Peru y Mexico.
Aruba Tourism Authority ta masha orguyoso cu e logro aki pa Miriam Dabian. Claro cu e ta confirma e profesionalismo y dedicacion di Dabian pa e producto Aruba, pero di otro banda e tipo di premionan y cobertura asina ta yuda tambe den e esfuerso diario di sigui promove nos isla mas ainda den e mercadonan den Latino America.