Willemstad – Mirador na Aeropuerto di Kòrsou lo no ta aksesibel pa públiko entre 14 di Febrüari te ku fin di Mart. Esaki, relashoná ku trabounan di mantenshon ku Curaçao Airport Partners lo realisá na e infrastruktura i e área rondó di esaki. Komo medida di prekoushon pa seguridat públiko, mirador lo ta será hermétikamente durante e periodo stipulá i lo no por hasi uso di e trapi i tampoko di e fasilidatnan pa parker di mirador òf parker den e área.

E mirador na Aeropuerto di Kòrsou ta situá kaminda tin hopi salpeter den airu i bientu fuerte. Konsekuentemente CAP ta hasi trabounan di limpiesa, mantenshon i renovashon ku regularidat i pa luna di febrüari i mart tin trabounan mas amplio planiá. E trabounan di mantenshon i renovashon ku lo tuma lugá entre 14 di febrüari i fin di mart ta konsistí di limpia salpeter, apliká fèrf resistente, remplasá e dak, adaptá e ‘reling’ di protekshon i mantenshon na e trapi entre mirador i aeropuerto. Pa seguridat públiko lo sera e área kaminda e trabounan lo tuma lugá hermétikamente, kual ta nifiká ku mirador lo no ta aksesibel pa públiko durante e periodo aki, i tampoko lo por hasi uso di e trapi òf e área di parker.