…CTB ta kontentu di por anunsiá…

WILLEMSTAD- 27 di ougùstùs 2013 :–  Ofisina di Turismo di Kòrsou (CTB) den su afan pa kontribuí na desaroyo positivo di nos komunidat i Kòrsou komo destinashon turístiko, resientemente a rekonstruí e miradó di flamingo na Jan Kok. E mirador a wòrdu konstruí na 2008, na 2010 a dun’é un facelift i e aña’ ki a hasi un rekonstrukshon kompletu. Ta importante pa suprayá e importansia di e mirador komo sitio turístiko; frekuentemente e ta risibí bishita di nos mesun hendenan i klaro, di nos bishitante nan for di eksterior ku ta fasiná ku flamingo. Debí na forsanan di naturalesa manera; bientu, awa, solo, salpeter i uso konstante di e miradó mester sòru pa mantenshon di esaki konstantemente. CTB a finansiá e rekonstrukshon di e miradó den su totalidat ; e trabounan a dura alrededor di 2 siman. Pues awor e miradó di flamingo na Jan Kok ta operashonal atrobe pa tantu e turista komo nos hende nan lokal. Pa CTB e punto prinsipal ta e seguridat di e bishitante i e flamingonan, pues e mirador aki ta brinda oportunidat di parkeo i un bista bunita di e flamingonan riba un distansia perfekto i stratégiko sin molestiá nan den nan habitat natural. Un petishon spesial na nos komunidat ku ta hasi uzo di e miradó; stashoná den forma responsabel i semper mantené e área limpi i bunita. Nos áreanan turístiko ta di sumo importansia pa Kòrsou komo destinashon i produkto turístiko. CTB ta sumamente kontentu di por pone su skouder bou di proyektonan di mantenshon, restourashon i rekonstrukshon di áreanan i fasilidatnan turístiko.