Willemstad– A kuminsá ku e entrenamentu di alrededor di 20 persona pa por bira opservador riba e barkunan peskero ku ta ópera na kosta di Afrika den awanan Atlántiko bou di bandera di Kòrsou.

E siman aki dos representante di e kompania di Spaña AZTI, esta sr. Jon Ruiz i sr. Iñigo Krug  a yega Kòrsou pa duna entrenamentu na nos hendenan lokal ku lo por bini na remarke pa traha komo opservador riba e barkunan ku bandera di Kòrsou ku ta piska den awanan internashonal.

E kandidatonan a ser rekluta pa medio di un aviso den korant i a keda selektá pa por risibí entrenamentu. Una bes ku esaki a ser pasa ku éksito nan lo wòrdu someté na mas training di seguridat i di marítimo básiko. Finalmente nan lo ser someté na un eksamen médiko i di bon komportashon.  Esnan selektá finalmente lo ser desplegá riba e barkunan peskero bou di guia di e opservadornan aktual pa hasi práktika. Despues di seis luna nan lo tin ku ópera independientemente. E entrenamentu aki ta resultado di e bishita eksitoso ku Minister Palm a realisá na Spaña luna pasa i ta kai bou di e kuadro pa kumpli ku eksigenshanan di Union Oropeo.

E tópikonan di entrenamentu ta enserá entre otro e tareanan, responsabilidatnan i debernan di opservador, kompilashon di datos relashoná ku kumplimentu di nos leinan. Tambe e opservadónan ta wòrdu entrená kon ta rekonosé e diferente espesie di piska i tambe e método i ekiponan di peska ku ta ser usa a bordo di e barkunan aki.

E opservadó nan lo mester disponé di entrenamentu i edukashon nóutiko básiko ku ta enserá kon pa sobrebibí riba laman ganchu i tambe kiko ta e aspektonan di seguridat, pagamentu di kandela a bordo i kon ta reskatá  personanan den laman. Tambe ta eksihí ku e opservadónan ta hopi bon di salú p’esei nan lo pasa un tèst médiko pa determiná nan kondishon físiko ta. E entrenamentu básiko i tèstnan médiko nesesario por wòrdu hasi na Kòrsou mes pa esnan ku no tin esaki.

Despues di entrenamentu kada opservadó ku ta bai traha riba e barkunan lo mester keda kuater luna sigui riba e barkunan. Un biaha pa luna e barku peskero ta bini tera pa aproksimadamente un dia. Despues di kuater luna e opservadónan ta keda dos luna na tera i despues nan lo bolbe subi e barkunan pa kuater luna atrobe.

Den korantnan lokal a saka aviso pa esnan ku ta interesá den e funshon di opservadó por a solisitá.  A resultá ku tin hopi interes pa e funshon aki.  Ta asina ku tin alrededor di 18 pa 20  persona a solisitá pa e funshon di opservadó. Minister Palm ta kontentu ku tantu persona, mayoria aktualmente desempleá, ta partisipá na e entrenamentu e siman aki na MEO.

Ta e intenshon di Minister Palm pa a korto plaso por kuminsá ku e entrenamentu di e inspektornan ku lo risibí nan kapasitashon na Spaña i ser desplegá na dos haf den e kosta west di Afrika, kual sigur ta krea kupo di trabou pa nos mes hendenan pa ser empleá entre otro den e industria di peska internashonal.