Willemstad- Dia 6 òktober 2015 Minister Palm a hasi entrega ofishal di Master Plan di Turismo 2015-2020 na Presidente di Parlamento sr. Franco. Minister Palm na dos diferente okashon a reuní ku parlamento tokante di e Master Plan di Turismo aki pa asina por haña “input” di nos parlamentarionan riba e sektor aki ku ta asina importante pa nos ekonomia. Sugerensianan ku a ser duna durante di e reunionnan aki a ser inkorporá den e produkto final. E Master Plan di Turismo ta definí e vishon, direkshon i strategia ku lo siguí pa e próksimo 5 añanan pa Turismo. E  plan aki lo krea por lo ménos 4000 kupo di trabou i tambe lo yuda ekonomia ku un kresementu anual di 2%, generando alrededor di 200 mion dollar. Sentral den e plan aki ta pa atraé mas turista for di Nort Amérika pero manteniendo lokual tin di e otro destinashonnan na e momento aki. E lema prinsipal ku lo ser usa pa merkadeo ta: “Curacao a Different Dutch Caribbean”. E Master Plan di Turismo resientemente a keda aprobá pa konseho di Minister i pronto lo ta disponibel riba e website di  CTB www.curacao.com .