Oposicion kier ta Carni y Pisca

Minister di Turismo Otmar Oduber a menciona cu  e ta dispuesto pa sinta cu AHATA  ainda pa papia riba e tema di All Inclusive. “Pero manera nan mes a bisa, datos riba impacto economico nan tampoco no tin, a sigui bisa cu ta logico cu no por tin dato riba un hende cu ta paga tur cos na su pais  cu ta estadia, cuminda, bebida, y transporte, pero na momento cu puntre na kico el a gasta placa, e no por duna contesta. Pesey e  mandtario ta kere cu ta perdemento di tempo balioso tin cu menasa pa un hotel por wordo bendi. El a recorda cu tempo cu a bende Westin y Radisson,  tur hende na Aruba y gremionan a pidi pa mas estudio y a bay corte, y a bisa cu no por cu mas All Inclusive. Y awor ta tuma un actitud di purba keda bon cu tur hende, door cu mester haci negoshi cu tur hende.

“Ami como politico tin cu keda bon cu e pueblo cu a scogemi pa defende interes general. Mi no ta defende interes personal ni comercial ni di grupo ni di persona.” Den tur esaki e mandatario  no ta compronde e posicion di oposicion cu no por caba di dicidi kico nan kier, esta si nan kier tin un regulacion di All Inclusive of no. Si nan ta haya cu falta algo den e ley, nan como miembro di Parlamento tin tur derecho pa bini cu un amienda riba e ley. Di otro banda, tin e declaracion di Andin Bikker cu ta papia di un Ley Inconstitucional pa cual kier pidi un di dos opinion di Raad van Advies. E ora, Oduber ta bisa, e ta puntra su mes si Bikker ta acusando Raad van Advies di no a haci su trabou den prome instancia, cu algo asina importante manera actuando en pugna di e Constitucion no a wordo ripara door di Raad van Advies.

“Esakinan ta excus di oposicion pa no scoge un posicion. Nan kier ta bon cu tur hende. Nan kier ta bon cu e comerciante pa ora nan bay eleccion y busca donacion cerca nan, y nan kier ta bon cu pueblo pero no kier tuma un posicion pa e interes general manera mester ta.” E mandatario ta  recorda cu ta Parlamento a dune e ordo pa haci un estudio y bin cu un ley pa regula All Inclusive. Si tin algo pa cambia, esaki por wordo haci door miembronan di Parlamento. E mocion a wordo pasa mas o menos un aña pasa den Parlamento caba. Durante e proceso pa trata e ley, tin chens cu un hotel por wordo bendi. Ya caba e mandatario tin copia di un carta di un Letter of Intention cu a wordo firma caba. Esaki ta un di e hotelnan cu no a firma e carta di AHATA, hunto cu algun otro, cu lo no bende nan propiedad den e proceso pa discuti e Ley di All Inclusive. Pues e informacion cu tin ta cu tres hotel ta den negociacion pa wordo bendi cu cadena hotelero All Inclusive. Mientras cu e ley no pasa, e hotelnan por wordo bendi.