Parkeermeters lo trece posibilidad nan grandi pa centro di ciudad mirando cu lo crea un miho structura di parkeo, treciendo nos hendenan mas den centro di ciudad. Lo tin mas siguridad y lo evita parkeo riba acera. Ta bin acerca cu e placa no ta bay den caha di gobierno sino den un compania estatal.

Ta obvio cu e presion di Arubus su gastonan ta sigui bira mas grandi, scolnan ta cabando mas laat, mester di mas bus, di mas chauffeur, mirando cu e cantidad di usuarionan ta aumentando. Sin embargo entrada di Arubus ta keda hopi limita. Costo di cada transporte di un hende ta mas of menos 5.50 florin sin embargo actualmente ta cobra 2.50 florin. Adicional por menciona cu pensionadonan ta gratis y studiantenan of esunnan cu ta practica deporte e tarifa ta reduci na 1.25 florin. Pesey e compania di transporte publico ta depende di subsidio di Gobierno di Aruba pa un 65%. Cu ta un porcentahe hopi halto compara cu cualkier pais rond mundo.

Minister di Transporte ta bisa: “ Gobierno anterior tabata tin intencion pa bin cu un proyecto di parkeermeters pero den man priva. Nos a mira cu nos por pone e parkeermeters den man di un compania estatal y awor por yuda Arubus cu su gastonan halto. Cu e contribucion di e parkeermenternan ta evita un aumento drastico den prijs di Arubus y mantene e subsidio pa nos grandinan y transporte escolar.”

Ta en espera di e ultimo Landsbesluit nan cu tin cu bin di Raad van Advies pa e introduccion di e parkeermeternan por tuma luga pa prome di september. Tur mashin ta na Aruba y e personal a ricibi nan entrenamento adecua pa opera e machinan aki. E mandatario a gradici DOW pa e trabou grandi di a marca tur e numbernan y espacio di stacionamento .

Sr. Oduber ta sigui bisa: “Esaki ta un posibilidad grandi pa centro di ciudad. Hopi ta esunnan cu no ta bin centro di ciudad pa motibo cu no tin caminda di staciona, y ta prefera di haci nan compras na otro luganan cu tin mas facilidad pa parkeo. Na momento cu bo por staciona mas cerca di e tiendanan lo crea un aspecto positivo. E ta crea un aspecto positivo pa locual ta trata siguridad den henter e area mirando cu lo tin Parkeerwachters lo controla y vigila henter e zona.”

Arubus lo inicia cu nan campaña di con pa uza e parkeermeter nan aki dentro di poco. Ta di spera cu e prome lunanan lo por tin confusion pero despues ta sigur cu e ta bay duna un bon resultado.