UNESCO ta drenta un epoca nobo y a sinta cu Minsiter Otmar Oduber pa dialoga. Unesco Raad awor ta consisti di 3 miembro nobo y 2 cu ta keda activo como miembro den e hunta di conseho y 1 ta e Secretaria General den perosna di Sra. Zahira Zaandam. Durante e reunion a papia riba proyectonan y plannan cu tin pa futuro, algun pa completa ainda e aña aki y otronan a largo plazo.

Minister Oduber a expresa di ta mira un UNESCO hopi mas activo cu lo por sali hopi mas afor y splica comunidad kico ta e tareanan, kico ta e responsabilidadnan, kico ta e comunicacionnan cu ta existi den mundo. UNESCO ta un di e sectornan cu ta cay bou di United Nations, cual ta crea posibilidadnan nobo.

A combersa riba e hecho pa usa UNESCO pa e plataforma pa hinca den scolnan e curiculo y aspectonan cu tin di haber cu cultura y turismo. UNESCO tin representacion tambe di Minister di Enseñansa, cual hunto cu e ministerio ey, por identifica den e sistema nobo cu ta wordo implementa na scolnan, 30 tema den scol basiconan unda nan lo ta mas activo. Minsiter Oduber ta amplia bisando “Lo tin mas presente den nan curiculum aspectonan local, aspectonan hopi mas cerca di cas, na Aruba mes cu ta wordo forma pa e Ministerio di Enseñansa na Aruba. UNESCO cu e plataforma cu e tin riba “wetenschappelijk niveau”, hunto cu e minsiterio, lo por percura pa 5 di e 30 programanan aki keda cla pa e aña escolar 2016-2017.” Intencion ta pa por tin material disponibel pa na un forma uniforma drenta na e diferente scolnan.

Ta trata di temanan manera entre otro Turismo, Agricultura y Arte unda cu materialnan cu ilustracion di Hulanda of internacional lo cambia. Sr. Oduber ta sigui comenta “Den e caso aki lo bay inculca den nos hobnenan for di scol primario caba e diferente aspectonan cu ta forma den principio e parti cultural di Aruba y di turismo cu ta nos pilar economico na e momentonan aki y pa e proximo añanan, pero tambe tin plataforma den UNESCO cu por amplia riba otro terenonan den e lista di 30 cu a keda identifica pa Departamento y Minsiterio di Educacion.”