Exitoso torneo di pesca cu Casi 600 kilo di pisca gara

Dia 29 di juli ultimo tabata dia internacional di piscador cu ta tambe ta e dia di San Rafael Arcangel Patron di piscadornan. Cu un reconocimento special pa tur cu ta eherce e bunita ofishi aki, a celebra den gran forma e fin di siman tras di lomba na centro di pesca Hadicurari.

Por mira atras na un tremendo torneo di pesca cu participacion di mas di 33 boto di cual 25 a participa den categoria open y 8 a participa den e categoria crioyo. Castro Perez di seccion di pesca na Santa Rosa ta comenta: “Por mira atras na un dia hopi exsitoso. A gara casi 600 kilo di pisca durante e torneo aki. Tin un grupo cu a gara Janpaunan gigantesco y tabata orguyoso di nan pesca.”

A tuma e oportunidad pa gradici e voluntarionan cu a colabora den e evento. Santa Rosa a percura pa un tremendo festival di cuminda di laman, cual tur presente a sa di disfruta.

Pa Minister Otmar Oduber cada piscador ta di suma importancia pa nos isla. Den historia di nos Pais nos piscadornan a semper ta resalta. Tin asina hopi leyenda cu a pasa di un generacion pa otro cu ta conta di e balentia y amor di grandi di e piscadornan cu tabata riesga nan bida pa por provee pa nan famia y e comunidad di Aruba. E mandatario ta finalisa bisando: “E piscado su dedicacion na e tarea aki ta un orguyo pa nos tur cu ta biba riba e pida baranca aki!”