Mientras cu oficialmente lo entrega esaki dentro di poco
Diahuebs mainta Minister di Turismo, Sr. Otmar Oduber a reuni cu hunta di supervision y directiva di ATA pa trata e presupuesto di aña 2017.
Minister Oduber ta indica cu 2016 a conoce retonan cu a sa di maneha por ehempel e mercado di Venezuela cu ta haci un influencia enorme. Tabata prepara pa e tendencia di e mercado aki mirando cu ya pa mas cu un aña caba a premira e situacion. Ta for di 2014 a cuminsa nota e fenomeno di e Venezolanonan cu pa motibo di e situacion social politico di nan pais, ta bin Aruba pa raspa carchi y a premira cu e fenomeno aki lo yega un fin tambe di cual awor por nota ta e caso. Mescos cu e tempo ey a conduci un crecemento di enter 5 mil pa 6 mil pasahero procedente di Venezuela, awor e ta disminui cu e mesun cantidad y te hasta na juli 2016 a conoce 12 mil pasahero menos for di Venezuela.
Minister Oduber ta splica:” Esaki ta nifica cu for di e momento cu tabata tin e reserva cu a conduci na e cifranan cu nos a conoce den pasado di 10 miyon of 17 miyon den ganashi pa cu e fondo di ATA den e añanan 2014 pa 2015, awor lo tin un disminucion. Lo sigui tin un entrada, lo sigui di tin ganashi of un ‘net result’ positivo pero cu ta menos cu e ultimo dos añanan y stabilisando bek den 2017.”
Esaki ta entre otro e discusionnan cu a hiba durante e reunion di diahuebs mainta unda a papia riba e adaptacion di e presupuesto ATA pa 2016 cu mester tuma luga, cual cu segun e mandatario ta masha minimal. Mientras cu den e gasto no tin cambio den entrada lo sinti esaki mirando cu por ehempel lo tin menos pasahero cu lo contribui cu e 10 dollar. Sr. Oduber ta indica cu pa 2017 lo tin cambionan notabel unda lo tin strategianan di hotelnan pa percura pa mantene nan grado di ocupacion cu wowo skerpi riba e competencia cu tin pa cu otro acomodacionnan. Lo nota cambio den tarifanan cu den e ultimo 5 añanan nos a mira keda crece alrededor di 30%, y lo mester bay adapta esaki pa keda competitivo.
Minister Oduber ta sigur cu e entrada lo keda uno positivo unda lo keda cu e mesun fondonan pa mercadeo, lo mantene un reserva di 20 miyon y lo tin un ‘net result’ pa Gobierno di Aruba cu ta calcula di ta alrededor di 5 pa 6 miyon pa aña.
Segun Ley ATA mester entrega e presupuesto aki prome cu dia prome di september na e hunta di supervision y na Minister unda cu ATA a bin ta cumpli cu esaki cabalmente.
Ta reuniendo riba e ultimo detayenan pa completa e presupuesto den e siman nos dilanti pa entrega esaki na Gobierno di Aruba y despues pa e keda trata den Parlamento di Aruba.