Studiante nan di Aruba ta haciendo un bon papel na universidad di Corsou

ORANJESTAD, Aruba Dialuna ultimo Minister Michelle Hooyboer Winklaar a bishita Universidad di Corsou enconeccion cu nan celebracion di 35 aña y tambe cambio di nomber di Universidad di Antias Hulandes (UNA) pa Universidad di Korsow (UoC). E rector magnificus, dr. Francis de Lanoy a reuni y splica e mandatario ampliamente tocante e diferente programanan cu ta wordo duna actualmente na UoC. Tambe a splica e maneho di e Universidad. “Loke ta val mi op ta cu tin un entusiasmo hopi grandi den e area tecnico den e studiantenan femenino cu ta bin di Aruba compara cu Corsou”, asina e Rector a informa e mandatario. E ta elogia e parti aki. E studiantenan ta wordo guia door di e departamento internacional di UoC na nan yegada. Pa dos dia nan ta haya un rondleiding rond Corsou den e parti nan importante manera Kranshi caminda nan mester schrijf in. Actualmente tin 99 studiante di Aruba na UoC di cual par ta biba den campus y otronan cu ta cerca famia of den mas un apartamento cu ta haci nan toch mas zelfstandig studiando na Corsou. Compara cu e otro paisnan cu ta bishita UoC, Aruba ta esun di mas grandi. UoC tin un total di 2,265 studiante den e aña escolar aki. E facultad mas grandi na UoC ta Facultad pa ciencia nan social y economia. Fuera di e programa nan normal, UoC tambe ta ofrece un total di 10 programa pa e studiante nan por alcansa nan “Master Degree”. Actualmente tin un di e programanan aki cu ta wordo ofrece via di IPA caminda e maestro nan ta participa y ta hopi importante pa bisa cu tin un total di 30 persona di Aruba ta participa pa esaki. E lesnan aki ta wordo duna via manera nan di tecnologia cu ta significa cu nan ta eherce nan trabao den dia y anochi ta sigui nan programa pa yega na nan “Master Degree”. E mandatario a intercambia algun di e plannan cu ta den discusion na nos universidad y sigur por bisa cu lo ta bon pa UA y UoC traha mas di cerca pa por siña di experiencia cu cada un a pasa of ta pasando aden.