Komo parti di esfuerso pa revitalisá nos zonanan Ekonómiko

Willemstad 26 di Novèmber 2017 –  Minister enkargá ku Desaroyo Ekonómiko, dr. Steven Martina i Minister enkargá ku Finansa Públiko, Sr. Kenneth Gijsbertha a habri portanan ofisial pa e Black Friday den nos Zona Ekonómiko na Koningsplein.  E Black Friday, ku a keda organisá dor di Curinde, riba petishon di algun komersiante den nos Zonanan Ekonómiko, ta parti di e esfuersonan ku Curinde ta hasi pa promové i revitalisá nos Zonanan Ekonómiko den eksterior.  Tantu Minister Martina komo Minister Gijsbertha a hiba palabra ilustrando e importansha pa nos tin Zonanan Ekonómiko floresente atrobe.

Curinde durante di e último añanan a bin ta hasi su máksimo esfuerso pa reestablesé nos Zonanan Ekonómiko atrobe komo pilá importante di nos ekonomia.  Zona Ekonómiko di Kòrsou a inisiá un trayekto mayó pa establesé su mes komo un zona kaminda tin respèt pa propiedat intelektual, ta zonanan ku bon seguridat i ta aktivo den krea e infrastruktura ku ta hasi’é atraktivo pa empresanan establesé nan mes i hasi negoshi for di nos Zonanan Ekonómiko.  Curinde a bin ta promové kompra den nos zonanan agresivamente den merkadonan manera Santo Domingo, Haiti, Trinidad i Surnam via di televishon, radio, korant, billboards i via di su strategia online inkluso su wepsite www.boutiqueofthecaribbean.com E Black Friday di e aña aki tambe a keda promové den region.

Pa loke ta trata merkado lokal, unikamente riba invitashon por a drenta i kumpra basta ku tin un negoshi registrá na Kamara di Komersio, manera ta preskribí pa lei.  Aplikashon di tur impuesto a keda na vigor riba e dia aki i komersiantenan mester a atené nan na e máksimo di benta di 25% di nan benta total, ku por keda bendé riba merkado lokal.  Loke a hasi e dia un berdadero Black Friday tabata e rebaho tremendo ku komersiantenan den zona a duna.  Tabata un oportunidat úniko pa sali for di p.e. stocknan aldia pero ku mester traha luga pa stock nobo ku ta na kaminda.  Ku aktividatnan manera un Black Friday Kòrsou ta krea mas evento pa kumpradonan bin nos isla i hasi nan kompranan den nos Zonanan Ekonómiko.  Ku mas hende bishitando i hasi kompra den nos zonanan Ekonómiko, mas sen ta lora pa e.o. liñanan aereo, taksistanan, hotel i esnan ku mester transportá e loke keda kumprá.

Curinde ta gradesido na tur ku a hasi e Black Friday posibel, muy en partikular Minister Martina i Minister Gijsbertha.