Willemstad – 8 di òktober 2015: Lamentablemente kalamidat ta mas serka ku bo ta pensa. Tambe na Kòrsou, kaminda e epidemia di Chikungunya, polushon kousá pa zeta na Jan Kok i e eksploshon mortal na Kruithuis ta fresku den nos memoria ainda. P’esei e di 3 edishon di Prevent Now! ta dediká atenshon amplio na kalamidat. Djabièrnè 16 di òktober un grupo di oradó úniko i internashonal lo duna 10 presentashon kòrtiku, kaminda kompanianan bishitante, instanshanan di gobièrnu i personanan privá por haña  konosementu i tep importante tokante maneho di kalamidat efektivo, siguridat den tráfiko i komunikashon den tempu di krísis.

Konseho di kalamidat internashonal

Oradónan internashonal manera Jim Campbell, líder di Red Alert Global Urban Search & Rescue team, Julie Roberts, direktor asuntunan eksterno di Florida Division of Emergency Management i David Preus, vise presidente di Ceres Environmental Services durante e seminario akí ta papia a base di hopi aña di eksperensia ku temblor, orkan i inundashon rònt mundu, i tokante e desaroyonan mas resien pa loke ta maneho di kalamidat.

Hasiendo esaki nan ta indiká tambe kon gobièrnu, kompania- i siudadanonan por traha huntu intensivamente pa por logra un reakshon rápido i efektivo. Banda di esaki nan ta enfoká riba e importansia grandi di un “culture of preparedness”, kaminda gobièrnu, kompania-, skol-  i hospitalnan ta bon prepará pa posibel kalamidat. E preparashon akí ta yuda limitá daño material i finansiero di un posibel kalamidat  i ta kontribuí pa  kompania- i siudadanonan rekuperá muchu mas rápido di un desaster.

Maneho di riesgo na Kòrsou

Despues di esaki oradónan lokal manera Nelson Navarro, minister di hustisia di Kòrsou, i Lesley Fer, direktor nobo di maneho di riesgo i kalamidat di gobièrnu di Kòrsou, ta hasi e tradukshon pa e aktual maneho di prevenshon i kalamidat na Kòrsou. Klousurando Heiko de Jong, ofisial mayó di hustisia,  ta atendé riba  importansha di koperashon entre sektor privá i públiko, i ta indiká kon esaki lo por haña forma den futuro na Kòrsou.

Pa tres aña kaba Prevent Now! ta dediká atenshon na prevenshon den e sentido mas amplio di palabra, kaminda e temanan di e presentashon- i  tayer di trabounan ta varia di kiebro i prevenshon di kandela te mas siguridat den tráfiko, salubridat  i ménos malversashon i cyber crime. E di 3 seminario  di Prevent Now! ku ta tuma lugá pronto, ta boga pa un maneho di kalamidat efektivo i konsientisashon riba nivel di komunidat. Elaborando riba e dicho tan popular ”Un hende atvertí ta konta pa 2, kisas un komunidat kaminda e siudadano, kompanianan i gobièrnu ta bon prepará riba tereno di maneho di kalamidat ta konta pa 3!

Mas informashon

Pa mas informashon tokante e seminario Prevent Now! na Kòrsou bishitá ennia.com.