WILLEMSTAD —  Djamars awor dia 24 di òktober, lo tin otro konsierto grátis pa pueblo di Kòrsou. E biaha aki e artista di honor lo ta nada mas i nada ménos ku Michele Henderson di Dominica.

Manera ta konosí,  na vários okashon, The Freewinds ta organisá konsiertonan grátis pa pueblo di Kòrsou, kaminda huntu ku artistanan lokal i tambe The Freewinds band ta duna un konsierto.

Michele Henderson

Michele Henderson ta un kantante oriundo di Dominica, un Isla algu mas grandi na superfisio ku Kòrsou,  pero ku ménos habitante, ku a  kaba di konosé un desaster ku orkan Maria ku a pasa riba e Isla algun siman pasa.

Na vários okashon Michele Henderson a yega di presentá aki na Kòrsou, inkluso algun aña pasa ora ku Freewinds a organisá un paranda navideño den diferente bario di Kòrsou riba un trailer.

Michele Henderson ta un artista internashonal ku tur hende por chek kon su kalidat di kantamentu ta riba You Tube.

The Freewinds Band

Ta bon pa menshoná, ku durante de presentashon di djamars awor, lo tin kompañamentu musical di The Freewinds band enkabesá pa e gran músiko I guitarista Franses Patrick Zaguray i tambe e otro músikonan talentoso di e tremendo banda aki, ku ta Susan di Italia riba Pianio, Jeff di Inglatera riba Bass i John Politakis di Grecia riba drùms. NGN Brazz tambe lo tei.

Entrada grátis

Manera a bira kustumber, entrada pa e konsierto nan ku Freewinds mes ta organisá ta grátis. E show ta kuminsá eksaktamente 8 pm i p’esei nos ta pidi tur hende pa nan tei for di 7:30 pa asina ei nan por subi i presensiá un tremendo show.

E barku Freewinds djamars awor dia 24 di òktober  lo mara na Nieuwe Werf ku ta keda pasando na Panamá bai abou. Pa bo  keda registrá pa un o mas asiento den e show aki, manda un app na  +59995130837  i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta. E number +59995130837 ta únikamente pa manda app, ya ku e no ta risibí yamada.