Ta buscando potretnan bieu of recuerdo di e tempo aya. E compania a nace desde aña 1920

ORANJESTAD, Aruba – 17 di februari 2016: Den cuadro di e preparacionnan andando pa celebra nan 100 aña di existencia, MetaCorp ta colectando tur material cu por yuda na forma e historia di e compania. Cu material ta referi na entre otro potretnan bieu, for di aña 1920 cu e compania a nace te cu awor.

E historia di MetaCorp ta parti den varios fase, manera nan envolvimento den pelicula, manera ta e teatro Gloria, Cinelandia, Principal, Rialto, Aurora, Esso Club, Eagle Club, Lago Heights club, Savaneta y De Veer Theatre. Tur esaki sin lubida e eventonan y proyectonan cu e compania a yega di organisa den nan historia, manera por ehempel cabayito, circo y concierto.

Otro fase den e historia di e compania ta encera nan envolvimento den e industria di transporte y tambe nan envolvimento cu produccion y distribucion di e refresco Coca Cola.

Ta aprecia masha si por tin hendenan cu por tin potret, memorabilia, documento, storianan of recuerdonan y cu lo kier comparti cu e compania, pa tuma contacto libremente cu MetaCorp na telefon 523-6090, 523-6077 of por manda un email na lboerwinkel@metacorp.aw. Ta conta riba e cooperacion di tur cu por tin cualkier tipo di recuerdo pa hunto yuda e compania yega na un historia bon documenta y hopi visual.