A rekoudá ku SO-nan mas ku 100 mil kaba pa RFTRC

WILLEMSTAD – Djasabra atardi alrededor di 5 or Curd Evertsz a kompletá e meta original di fundashon Ride for the Roses Curaçao (RFTRC) pa kana 1000 km den kuadrio di ‘RFTRC Standing Order 1000’ na kaminda pa e di 15 aniversario di e fundashon. E kanamentu mester a bai sam-sam ku kolektá standing order nobo na fabor di RFTRC i esei tambe a logra. Djasabra, na yegada na e punto final, Curd Evertsz a anunsiá di ekstendé e meta pa 1500 km kontal ku e ora ei tambe por sigui registrá mas standing order nobo. 

Na mart e aña aki ‘Solo Walker’ i visepresidente di RFTRC Curd Evertsz a kuminsá bou di e título RFTRC Standing Order Awareness Tour ku e ophetivo pa kana 1000 km na kaminda pa e di tres lustro di RFTRC na yanüari 2019. Esaki mester a bai pareu ku standing order-nan pa un suma mensual komo kontribushon na RFTRC ya ku tur loke ta rekoudá, ku intervenshon di Prinses Wilhelmina Fonds (PWF), finalmente ta bai na benefisio di e lucha kontra kanser i e kuido di pashènt di kanser na Kòrsou.

Buddies

Djasabra último for di mitar di 11 di mainta Curd Evertsz a kuminsá kana e último alrededor di 30 di e 1000 km ku salida na Kraké. Despues di a yega na e punto final, e edifisio di PWF na Scharlooweg i hasta promé ku ora programá, el a anunsiá ku e ta adaptá su meta. Den lus di e di 15 aniversario ku ta aserkando, e ta sigui kana te yega 1500 km bou di e kondishon ku e kantidat di standing order tambe ta keda subi.

Dos siman pasá Ride for the Roses ya a logra ku e akshon aki ku e standing order-nan firmá huntu a alkansá basta mas ku 100.000 florin fiho riba un base anual ku tur luna ta traspasá pa RFTRC. Awor ku ta sigui ku e akshon te 1500 km por spera ku e esaki lo resultá den un bunita suma final sin presedente. En prinsipio Curd Evertsz tabata kana e so, pero rondó di dje a forma un grupo di buddies ku tambe a perkurá pa optené standing order. Aplikashonnan nobo pa standing order ta keda bonbiní atraves di e direkshon di e-mail so1000@ridefortheroses.net.

Djasabra tambe un grupo di buddies a kana parti di e ruta, meskos ku esnan ku a firma un SO kaba i otro voluntarionan ku ta duna nan sosten i personal di Marina Hulandes bou di guie aid Komandante De Vin. Ademas promé minister Eugene Rhuggenaath i minister Steven Martina di desaroyo ekonómiko tambe a kana na e okashon aki. Na mitar di e ruta miembronan di VKC tambe a djòin i riba e último parti e drùmbènt di VKC a kompañá e grupo.

Formularionan di SO

Ya tabata eksistí e posibilidat pa persona i instansianan traspasá tur luna un sierto suma di plaka pa e fundashon. Esaki por ta un fuente interesante pa e esfuersonan ku ta hasi tur aña ku e Ride-Sail-Swim-Walk for the Roses. Na tur banko lokal tin formulario pa standing order, pero klaro ku RFTRC i Curd Evertsz gustosamente ta yuda ku formulario di e banko di bo eskoho. Esun ku ke duna, ta yena e formulario i ta outorisá banko pa transferí tur luna un sierto suma pa RFTRC. Esaki no ta rekerí mas paso i por kontrolá e transferensianan aki, sin ku tin gastu bankario mará n’e i sin muchu papeleo.