Minister Otmar Oduber

Durante un rueda di prensa di Minister Otmar Oduber el a señala e hecho cu un biaha mas MEP ta mal informa nos comunidad y a ta demostra un falta di conocemento. E fraccion geel a propaganda cu turismo ta bayendo asina malo cu US Airways a para nan vuelonan pa Aruba. E comentarionan aki no ta solamente ta demostra e malicia cu tin tras di esaki, pero tambe e hecho di e falta di conocemento cu por ta existi entre e miembronan di fraccion di MEP.

Minister Oduber ta splica cu ta for di 2 aña y mey pasa e compania aereo US Airways a merge cu American Airlines, caminda nan lo opera bou di e nomber di American Airlines. E avionnan cu nan a caba di sali for di circulacion ta e ultimonan cu tabata den circulacion di e region di Latino America di US Airways cu awor lo comberti den American Airlines. E mandatario ta bisa: “American Airlines sigur no ta reduci su vuelonan,  e frecuencianan lo keda mescos pero cu e diferencia cu e avionnan lo tin e logo nobo di American Airlines. Bo ta mira claramente ora no tin argumento y mas leu ainda ora no tin conocemento riba e tereno aki, nan ta purba di trece intrankilidad cu e tipo di informacion asina aki haciendo como si fuera cu algo negativo ta tumando luga.”