Willemstad– 10 di novèmber 2015: Reglamentu di daño di outo awor a bira mas fasil serka ENNIA. E kliente no mester akudi na ENNIA mas pa mèldu daño; algu ku hopi bia ta bai akompañá pa tempu di espera largu i yenamentu di formulario. Desde awe e kliente mes lo risibí un yamada di ENNIA dentro di dos dia di trabou pa reglamentu di daño.

E método nobo aki – ku ta spar hopi tempu pa e kliente – ta posibel danki na e renobashon di e proseso di trabou interno i palabrashonan nobo ku Forensys. Forensys ta regla tur informashon i dokumento nesesario di daño di tur partido enbolbí i nan ta sòru pa ENNIA risibí esaki dentro di 24 ora. Ta importante pa yama Forensys tur bia ku tin daño na outo, ya asina esaki por keda registrá di forma korekto. Danki na e método nobo aki kontakto direkto ku e kliente òf e otro partido no ta nesesario mas.

Chief Operation Officer, Chantal Pietersz-Seferina, ta deklará: “Despues di un análisis profundo di e proseso di trabou i despues di a buska un manera mas amabel pa e kliente por regla daño na su outo después di un aksidente, nos a skohe e solushon aki. Nos ta traha duru pa yega na mehorashon i komodidat pa e kliente. Den futuro por spera mas mehorashon di nos parti. Algun aña pasá nos a terminá e propio riesgo di seguro WA i esaki tambe a trese mas benefisio pa e kliente den reglamentu di daño na outo.”

Ku e método nobo aki claim di daño no ta wòrdu tratá sin un rapòrt di Forensys. Forensys lo hasi un rekonstrukshon di e aksidente si a kaso nan no logra yega mesora después ku daño a keda registrá. Tin eksepshon ora ta trata di ladronisia òf kiebro di vehikulo. Den un kaso asina e persona enbolbí ta tuma kontakto ku polis, ku na su turno ta traha un prosès verbal. Esaki ta nesesario pa entregá un claim. E prosedura nobo aki ta duna e kliente i alabes e otro partido mas trankilidat i nan ta pèrdè menos tempu pasombra e daño ta keda tratá telefónikamente.