Un mucha muhé lanta den un famia humilde i e di 8 for di 9 ruman. For di su 7 aña di edat ya kaba su mayornan a kuminsá diskubrí ku e tabatin talento artistiko. Na skol semper e tabata haña 8,9 of 10 pa kantamentu. E tabata gusta kolekshoná poster di kantantenan i tur poster ku e tabata haña den su kaminda, e tabata kue nan e pega na muraya. Mainta ora ku e lanta, promé kos ku e tabata hasi ta sende radio den kas i merdia ora ku e yega for di skol e tabata gusta toka riba hember i bati riba tur artefakto ku e haña den su kaminda pa e saka sonido, segun e tabata kanta i ta tin momentunan ku bisiñanan mester a pidi pordon pa nan por a drumi merdia. Melania ora ku su tata tabata trein kanta ranchera na kas, e tabata kanta sam sam ku su tata Boebuchi van der Veen, un di nos mihó kantantenan di músika mexicano na Kòrsou. Ku 14 aña di edat su mama a lagué bai partisipá na un festival di músika mexicano kaminda ela bai ku kasi tur premio i for di aki su interes a lanta mas i mas pa kanta. Bayendo St. Ignatius College a bin sali oportunidat pa melania representá su skol den Festival Bos eskolar kaminda ela sali di dos finalista. Despues di ey e diferente hobennan ku a partisipá na e festival a keda aserká pa e organisadó pa forma parti di un grupo ku nan a lanta pa asina konservá e talentonan i no laga nan bai pèrdí. Ela sigui kanta komo miembro di e grupo aki ku a konta ku diferente talentonan grandi hoy en dia. Melania pa un aña a bishitá e instituto di músika FIM kaminda ela risibí un base, pero tòg ela bin sinti ku su sintimentu no ta pa toka ningun tipo di intrumento, sino kanta, kanta i kanta……………

Trabou den bida diario

Aktualmente Melania tin 13 aña ta traha komo periodista na e matutino Ultimo Noticia

Toro Colina i Oswald Specht parti dje bon fundeshi

Un dia ela keda aserká pa humberto Nivi pa partisipá den un festival bos di oro kaminda ela duna masha bon presentashon i tabata faborito grandi di e publiko, pero e no a kai den e tres promé premionan i aki e propio Humberto Nivi a ofresé Melania pa bai Pto. Rico tòg  i te hasta ela prepará Melania ku diferente lès di aktuashon i artikulashon. E tempu ey bou di guia di Humberto Nivi, Ced Ride kende a traha su kansion pa e por a partisipá kuné, Toro Colina i Oswald Specht, Melania a sali Kòrsou ku apenas 17 aña bon prepará i kai den e finalistanan aya. Na su regreso ela keda aserká pa  El Toro Colina pa bai forma parti di un revista dominikando na Plaza Hotel kantando huntu ku Ced Ride kaminda Melania a bin madurá i haña masha hopi eksperiensha komo interprete. E siguente aña ela partisipa na Fetival Bos do Oro kaminda ela sa di konkistá ku derechi pa representá Kòrsou un biaha mas na Pto Rico kaminda ela bin kai den e miho 5 finalistanan pa bos. Na su regreso ela bolbe haña oportunidat pa kanta den un otro revista na Plaza Hotel huntu ku Toro Colina i su Orquesta i tambe Ernest Willems. I for di aki portanan a sigui habri  i exitonan a keda bini tras di otro pa Melania. E aña ey tambe ela partisipá pa promé biaha den festival di Tumba ku e Tumba “Torié Holé” ku a kai den e mihó 8 tumbanan i a bira e tumba di mas popular e aña ey. Ela yega di  partisipá den Festival di tumba ku e Orkesta di FIM, Doble R, Caribbean Band, ERA Outentiko, GIO Melania nunka a para ketu e te hasta na momentu ku e no tabata kantando di un forma aktivo pa motibu di su responsabilidat komo mama, ela keda move den farandula ku su revista semanal Ki-Tin e tempu ey i e tabata dediká si mes na yuda diferente mucha i hobenan ku tabata partisipá den festival i ku tabata aserké pa yudansa. Ela kanta musikanan kultural ku tipiko i te hasta ela viaha pa Argentina huntu ku Grupo Dushi Kòrsou kaminda ela kanta nos dushi ritmonan krioyo.

Ganador di diferente Festival

Melania a gana Festival di OTI Antiaas, Caribbean Broadcasting Union Festival na Trinidat, na diferente okashon ela gana Tarima Award,

E ta dominá tur tipo di músika

Melania a kuminsá su karera kantando Ranchera, despues ela konsentrá den Balada i Bolero, ela kanta músika Gospel, Reflection, Salsa, Montuno Merengue, Túmba i te hasta e tribi di kanta i graba tambú. Resientemente Melania a kanta un kansion na idioma hindú pa yu homber di un famia hindú promintente su matrimonio na Punta Cana i aki Melania a demostrá ku e no tin miedo di kanta ningun klase di musika ni idioma pasobra músuka ta un idioma e ta i e ta hasi tur hende kontentu, pero apesar di tur e tipo di músikanan ku ela yega di kanta, su tipo di músika ku e ta gusta kanta  i skucha ta badanan estilo soul (reflection).

Su propio Novela musikal

Tambe Melania yega di skirbi un mini Novela musikal di pasku, kaminda ku a konta ku partisipashon di diferente personahe konosí den farandul na Kòrsou. Ela yega di presentá na Aruba, Boneiru, Kòrsou, Hulanda, Sint Maarten, Venezuela, Puerto Rico, Spaña, Miami, Trinidat, Sto Domingo i Argentina. Despues di tabata algun aña kantando komo entertainer na diferente sitio, Melania a disidí di wanta un ratu ya komo e tabata aktivo ku programa na Radio i pagina den korant i trabounan a bira demasiado. Ela keda aserká pa Perfecta Son na aña 2002 pa bira un di nan kantantenan i sin tabatin ningu klase di ekperiensha kantando den banda na fiestanan bailabel ela sa di adaptá su mes na e genero di músika i e publiko aki di kua ela gara nan kurason tambe i na luna di november Melania ta kumpli 2 aña kantando ku Perfecta Son.

Kontrato ku Sonografica i Sonotone

Melania su logronan mas grandi tabata realisashon di su propio produkshon ku e keda grabá na New York i Sta Domingo huntu ku e popular areglistanan Sergio George i Manuel Tejada i Uti Gregorio i tambe Toro Colina. Huntu ku esaki ela firma un kontrato ku e seyo diskero Sonografica i Sonotone. Na 1993, pero lamentablemente, fayesimentu di su pareha a pone ku su bida a kue otro rumbo i ela skohe buta su soñonan un banda i karga e responsabilidat di Mama i tata, dedikando su bida na su dos yu muhenan Melissa i Tabitha i hasi di kantamentu un hobby. Sinembargo kansionnan manera Es que te ame i cosas diferente a pega bon tantu na Cuba, como na Venezuela i esakinan a hiba Melania na presentashonnan na e kanalnan Venezolano RCTV den show di Gullermo Gonzales, Sabado Sensasional i kanal 7. Na Venezuela ela realisa un tour na 43 radio emisora rond Venezuela i presenta den show huntu ku Los Melodicos e tempu kompana pa musikonan Venezolano.

Pa tres aña siguí kantante femenino di aña

Pa tres aña sigí melania tabata e uniko kantante femenino na Kòrsou ku tin eksito tras di eksito pegá na radio emisoranan. E kantante kada biaha ku e saka e graba ku Perfecta Son, ela sa di  pega un hit, loke a hasié masha solisitá i ku un agenda hopi druk. Pa tres aña sigui, praktikamente tur medio di komunikashon a bin ta saké kantante femenino di aña. Na 2005  ela gana premio Edgar Supriano  komo kantante femenino di aña i e aña siguiente, esta 2006 i ela bolbe gana premio edgar Supriano komo un dje figuranan di farandula mas popular di 2006. Su hit e aña ey na Kòrsou tatabata e kansion “Te na Fin di mundu”, sinembargo mester bisa ku e kansion “Tenemi bibu den Amor” for di su kompakto “Melania Bibu den Amor” tabata hit grandi  na Boneiru i Aruba. Algu masha kurioso, pero great ku Melania a bin ta ripará den su karera  e añanan ey tabata  e echo ku no obstante e ta kanta kansionanan fuerte kontra di hende hòmber, tog ta hasié masha gustá i admirá serka e sekso maskulino, ya komo praktikamente tur siman Melania riba su agenda mester tin un presentashon privá i hopi biaha sea ta kasá o futuro kasá nan ta invitá Melania pa kanta pa nan partner na resepshonnan di matrimonio o kumpleaño ku e komentario “ Mi kasá o mi frei ta admirabu i gustabu kanta hopi i mi kier surprise e ku abo kantando”. Aki Melania a bin ripará ku e mensahenan tòg ta yega di un forma positivo den kurason di e sekso maskulino.

Melania a konkista kurason di Arubianonan tambe

Durante di aña 2006 Melania  tabata artista invitá riba e produkshon músikal di Shurby Maria i riba e produkshon aki sigur e kantante ta demostrá di ta poseé un tremendo bos. Na luna di mei Melania a sa di konkistá kurason di hopi hende na Aruba durante di su presentashon ku Perfecta Son na e gran selebrashon di e team di futbol kampeon Estrellas di Aruba,unda ela yama Claudius Phillips subi stage i interpretá un kansion huntu kuné di un forma espontaneo. E aña aki diferente di Melania su kansionnan a pega formal na Aruba, prinsipalmente e numero “Tenemi bibu den Amor”. E kansion aki a hibe na tres diferente presentashon tras di otro i ela sa di demostrá su talento komo kantante, artista i su bon dominio riba publiko semper.

Konsierto akustiko na kas di kultura Aruba

Tambe mei mei di e aña ey Melania a presenta den un konsierto akustiko na Kas di Kultura aya na Aruba i aki un biaha mas esnan ku ta tei a keda sumamente enkantá ku su bos. Debi na  kompromiso ku su trabou diario, Melania a tuma e desishon di bandona filanan di Perfecta Son, pa asina e por kumpli ku su kompromisonan komo solista tantu privá komo publiko, pero ketubai e ta keda haña petishon pa presentá komo artista invitá na fiestanan, aunke ku ela wanta hopi pa no kai den e tentashon.

Bek kantando pa pueblo baila ku eksito

Pa motibunan personal Melania a skohe pa un vida mas trankil un aña largu, aña den kua ela keda aserká pa diferente agrupashon, pero ela preferá na keda kanta komo solista pa un tempu i resientemente Ela keda  konvensé pa Orquesta Diesel pa bira nan cantante i después di drenta den apenas dos siman Ela pega un Hit  komponé pa Ageo Basilio, indikando ku “Kos bon tei bira mihó”, loke a sosodé tambe. Na  e mes un aña  aki Melania a tuma otro reto pa kanta un kansion na Idioma Hindu durante di matrimonio di un famia hindu prominente  ku a tuma lugá na Punta Cana (Republika Dominikana. Esaki tabata un eksito grandi i e remarkenan di tur e hindunan tabata k uta manera ta un kantante k uta papia e idioma ey tabata kantando. Aña 2009 tambe tabata un aña hopi bon pa Melania. Bon presentashon den Festival di Tumba Diferente presentashon eksitoso na Aruba, Boneiru, Korsou i Hulanda. Un hit grandi “ Mi’n ke niun homber manda riba mi” ku a pega formal na Aruba Boneiru, Hulanda i Korsou. E kansion ey a figura riba tur e topnan di fin di aña. Na Radio Mas i Radio Hoyer a skohe Melania komo kantante femenino di aña. Na komienso luna di desember Melania a tuma su retiro for di Orquesta Diesel ya ku ela skohe pa e bai kanta riba un low profile no den fiestanan mas. E ke pasa mas tempu huntu ku su dos yunan ku por sierto ta mayor di edat, pero ku ketubai ta bibando serka dje. Melania na fin di aña 2009 a traha  un CD ku kansionnan di Pasku  i ta e intenshon pa esaki bira un proyekto ku ta kontinua kada dos aña. Durante di Melania su karera artistiko ta hopi ta e artista i bandanan lokal ku ela yega di graba un of mas kansion kune manera Explisivos, Forsa Dos, Diesel, Perfecta Son, No Game (Reinier Lijfrock) Boy Thode, Rafelin Hernandez, i di Aruba Sherby Maria, Di HulandaQ- Sign, Succes. Melania e kanta den hopi show ku artistanan Internashonal di renombre ku a bishita Korsou. Aparte di Balada, Bolero, Montuno, Salsa, Bachata i musika Soul R&B, Melania ta domina musica Ranchera i Trio perfektamente. E ultimo anjanan aki e tipo di musika ku mas e ta kanta ta musika Gospel. Resientemente Melania a kanta komo artista invita di Agrupashon S,O den un cruise di un siman riba e barku krusero Pollmantur Monarch  kaminda M+elania a sa di pone masha bon ambiente pa turistanan. Aktualmente Melania ta dediká hopi di su tempu liber pa yuda organisashonnan k uta traha na benefisio di esnan menos pudiente ku so konosementu organisatorio i su talento. Tambe Melania ta Co-presentado di e programa di Televishon “Bo Trai merdia” huntu ku Hubert Hoogvliets.