Riba invitashon di Kas di Kultura artista visual Martie Genger tin un eksposishon den Villa Maria na Scharloo. Djadumingu, 22 di òktober tin un Meet & Greet ku Martie Genger entre 10:30 i 14:00 or.

Titulo di e eksposishon ta ‘Stima Otro. Bida di Martie Genger’. Riba djadumingu Martie Genger lo ta presente pa duna splikashon tokante e eksposishon, material ku e ta usa i su manera di traha. Semper ta masha interesante pa tende e artista mes splika kon e ta traha, i dikon e ta ekspresá su mes di sierto manera. Serka Martie Genger sigur esaki ta e kaso, komo e ta definí promé lokual e ke ekspresá i despues ta adaptá material i téknika na e obra.

Martie Genger ta usa material alternativo manera palu, hilu, metal i plèstik. Sierto obra ta traha di material resiklá, manera e obra ‘Out of Habit’ kaminda e paña di kushina ta funshoná komo su kanvas. Pa otro obra e ta usa téknika di obra di man manera brei. Serka e obranan aki e eskoho pa e téknika ta bon pensa i ta pone énfasis riba su mensahe.  Esaki ta e kaso na e obra di un kolo kòrá bibu ‘Hot, Heat, Hitte’ kaminda un teduki di brei, ta simbolisá e kalor ku el a eksperensha dia el a imigrá, biniendo for di un klima friu ku hopi áwaseru.

E eksposishon ta deskribí diferente fase i eksperensha den bida di Martie Genger. E ta duna un bon bista di su oeuvre i ta enserá diferente obra ku nunka ántes tabata den un eksposishon.   Den esena lokal di arte visual  Martie Genger aktualmente ta parti di e tòp di artistanan.

Kurator di eksposishon ta Josée Thissen-Rojer. Spònser di e proyekto ta Stichting Monumentenzorg Curaçao.  Na Villa Maria por bishitá tambe eksposishon ‘Tula, Historia Kompartí’, ku obra di artista visual, basá riba publikashon di drs. Charles Do Rego ‘Sklabitut i Rebelion 1795’.
Por bishita eksposishon den Villa Maria kada djabièrnè, djasabra i djadumingu: 20, 21, 22 òktober i 27, 28, 29 òktober 2017. Habri entre 9 AM pa 4 PM (non-stop).

Villa Maria, Van den Brandhofstraat, Scharloo. Entrada ta grátis.