Despues di e éksito di aña pasá, Fundashon Cur2Cur e aña aki ta bolbe organisá e seminario di media yamá Media Boot Camp 2014.

MEDIA WORKSHÒP INTENSIVO

E seminario aki ta konsistí di workshòpnan kaminda profeshonalnan lo kompartí nan konosementu i eksperensia riba diferente area manera sinematografia, diseño gráfiko, broadcasting, branding, motion graphics, fotografia, effective communication i hopi mas.

IMPAKTA MEDIA POSITIVAMENTE

Konsiente di e impakto enorme ku medionan di komunikashon tin riba opinion, emoshon i desishonnan den nos komunidat, Fundashon Cur2Cur a tuma e desishon firme pa impaktá media di un forma positivo i tambe inspirá e komunidat di Korsou pa desaroyá nan mes riba e tereno di media i asina alkansá profeshonalismo.

ORADOR LOKAL I INTERNASHONAL

Lo tin kontribushon di profeshonalnan lokal pero tambe internashonal manera Ayrton Tromp, fotografo di Aruba i Sebastian Collazo(Chile). Sr. Collazo, direktor di e kompania Feels (www.feels.tv), ta bini pa kompartí su ekspertisio den e area di media. Su kompania ta traha ku kompanianan di renombre manera HBO, Android, Coca Cola i tambe Sony.

MEDIA BOOT CAMP 2014

MBC2014 ta tuma lugá for di 7 pa 12 di yüli di 8:00 pa 16:00. Pa personanan ku partisipá henter e siman aki, MBC2014 ta kosta solamente fl. 36-, pa dia, ku tur material i lùnch inkluí. E seminario aki lo kulminá ku un Movie Award Ceremony Night riba 13 di yüli. MBC2014 ta un seminario habrí pues tur hende for di 14 aña bai riba por partisipá, pero e kandiat di partisipantenan ta limitá. Na final di e seminario, partisipantenan lo risibí un medaya i un sertifikado di partisipashon.

REGISTRASHON

Tur persona ku ke registrá por hasi esaki via www.mediabootcamp2014.com. Riba e sait aki tin tur sobrá informashon tokante MBC 2014. Pa risibí kontesta riba kualke pregunta lo por tuma kontakto via 560-6611 òf por manda e-mail na info@mediabootcamp2014.com.