WILLEMSTAD – Hopi ta esnan ku kisas ta kòrda ku famia Do Estreito a kuminsá ku un toko chikí mas ku 40 aña pasá riba Oude Caracasbaaiweg ku tabata yama Maria Teresa.   Despues di un temporada kòrtiku ku nan a bai biba bèk Madeira nan a regresá Kòrsou na aña 1977 i a kumpra un tereno ku un kasita riba dje. A drecha e kasita aki i hasié un toko ku a keda yamá Toko Mangusa. Ku determinashon, trabou duru i konfiansa den nos ekonomia Toko Mangusa a krese i bira Mangusa Minimarket na aña 1984 i na 1989 Mangusa Supermarket. Dia 14 di novèmber 2011 Mangusa Hypermarket a habri su portanan na Cas Coraweg 43.

Pa mas ku 20 aña Mangusa ta un di e klientenan mas grandi i apresiá di Maduro & Curiel’s Insurance Services (MCIS) i Maduro & Curiel’s Bank (MCB). P’esei selebrashon di 40 aniversario di Mangusa Supermarket no por pasa MCIS i MCB sin mas i gerensia di MCIS i MCB a hasi un bishita di kortesia na gerensia di Mangusa Supermarket pa felisitá nan ku e logro grandi aki. Alabes a hasi entrega di un bunita kuadro di André Nagtegaal pintá spesial pa e supermerkado su aniversario. Maduro & Curiel’s Insurance Services i Maduro & Curiel’s Bank ta yama henter e famia di Mangusa Supermarket masha pabien ku nan 40 aniversario i nan por sigui konta ku respaldo di MCIS i MCB.