Willemstad – Resientemente Maduro & Curiel’s Bank tabatin un enkuentro ameno
kaminda na okashon di selebrashon di 25 aña “MCB Trabou boluntario un Echo” a hasi
entrega di ‘MCB Volunteer Awards’ na diferente kolega di Banko ku ta hasi trabou
boluntario. Na e okashon aki, koleganan di diferente departamentu tambe a haña un
muestra di apresio pa proyektonan ku nan a organisá komo deportamentu i ehekutá pa e
proyekto ‘Live, Love, Smile’. E proyekto Live, Love, Smile ta e proyekto boluntario mas
grandi ku MCB ta organisá tur aña den luna di desèmber. Koleganan, amigunan i konosínan
a demostrá un entusiasmo èkstraordinario durante e 77 proyektonan den aña 2022 i pa e
motibu aki a duna rekonosementu na e proyektonan mas kreativo, mas inklusivo, mas
duradero i departamentunan ku a organisá mas proyekto.
Trabou boluntario ta forma parti integral di e kultura i filosofia di MCB. Ya pa hopi aña
koleganan di MCB ta hasi trabou boluntario den diferente área den nos komunidat sea
promé, durante òf despues di ora di trabou. E áreanan di e trabounan boluntario ta varia
por ehèmpel di “leesmoeder/leesvader,” coach di deporte, asistensia na grandinan,
klupnan di servisio i Special Olympics. Ademas di esaki diferente kolega ta hasi trabou
boluntario pa diferente organisashon ku no tin finnan di ganashi (non-profit) den kual e
koleganan ta kompartí nan ekspertisio den entre otro e ramo finansiero, di organisashon
òf IT.
Maduro & Curiel’s Bank ta sigui duna su aporte ku trabou boluntario i ta enkurashá
kompanianan lokal pa duna nan empleadonan oportunidat pa hasi trabou boluntario, ya
ku esaki ta un aporte positivo na nos komunidat.