WILLEMSTAD- Komo parti di e proyekto di e Amiguitu Spardó Lito “Kuida Bo Skol i Stima Bo Skol”, Lito, Maduro & Curiel’s Bank huntu ku Curaçaose Atletiek Bond ta organisá djasabra atardi dia 29 di novèmber na SDK, Kareda di Lito. E kompetensia di korementu entre skolnan di fundeshi. Alumnonan ta kore den diferente kategoria i gana premio pa nan skol. Tur skol di fundeshi a risibí un karta i formulario di inskripshon ku e muchanan mester yena kompleto i laga nan mayornan firma. E formulario mester keda entregá huntu ku 1 florin pa mas tardá djarason dia 19 di novèmber próksimo na nan skol mes. E dosente enkargá ta registrá tur e alumnonan den un sistema digital ku tin e siguiente adrès di website: http://www.goeasyware.com/easysport/easy/whichmeetlogin.php. E formularionan i sèn di inskripshon, e dosente ta entregá na departamento di Marketing/PR di Bo Banko Amigu (Saliña, promé piso) pa mas tardá djaweps dia 20 di novèmber. Tur mucha ku partisipá ta haña un bunita T-shirt di Kareda di Lito pa nan kore aden. Repartishon di e T-shirtnan ta tuma lugá djarason dia 26 di novèmber na SDK. Orario di entrega di T-shirt ta keda anunsiá despues. E karedanan ta start 3 or di atardi na SDK. Muchanan ta kore den diferente kategoria durante Kareda di Lito; Grupo A: 6 i 7 aña (premio pa mucha muhé i mucha hòmber separá) ta kore 700 meter; Grupo B: 8 i 9 aña (premio pa mucha muhé i mucha hòmber separá) ta kore 1200 meter; Grupo C: 10 i 11 aña (premio pa mucha muhé i mucha hòmber separá) ta kore 1.600 meter; Grupo D: 12 i 13 aña (premio pa mucha muhé i mucha hòmber separá) ta kore 1.600 meter. E ganadó di e diferente kategorianan ta risibí NAf. 1.000,–; number 2 NAf. 500,– i number 3 NAf. 250,–  ku por keda usá pa proyektonan di nan skol. Di kada kategoria, e promé 10 finalistanan ta risibí un bunita medaya serka Lito. Tur mucha ku partisipá lo haña despues di kareda un fruta; algu di bebe i un medaya di partisipashon. Skolnan ku pa un ὸf otro motibu no a risibí formulario di inskripshon òf si tin kualke pregunta por tuma kontakto ku Maduro & Curiel’s Bank N.V. na 466 1467 of na jennifer.martinez@mcb-bank.com. Bo Banko Amigu ta invitá tur mucha di skol di fundeshi pa ban race e aña aki ku Lito riba djasabra 29 di novèmber na SDK. Yena bo formulario di inskripshon i entregá esaki na tempu pa bo no keda afó!

Un i tur ta bon biní pa bin apoyá nos muchanan na SDK.