Willemstad – Maduro & Curiel’s Bank, den kuadro di su selebrashon rumbo pa 100 aña, di un forma kreativo, dinámiko i dibertido ke hasi muchanan konsiente di e importansia di alimentashon korekto, bida saludabel i alabes inspirá maestro i mayornan pa nan keda konsientisá, guía i duna sostén, na nos muchanan pa biba mas salú. Esaki ta tuma lugá pa medio di e kompetensia (eskolar) #100PaSalú. Na final di e kompetensia MCB ta repartí mas ku NAf. 30.000,- bou di e skolnan ganadó.
Partisipashon di tur skol i kompetensia
#100PaSalú ta un kompetensia spesial pa muchanan di skol di fundeshi i skol sekundario. TUR skol por partisipá. Envolvimentu di mayor i maestronan ta sumamente importante pa mantenshon di un bida saludabel na kas i na skol. Skolnan por inskribí te djarason 24 di ougùstùs via email 100pasalu@mcb-bank.com
#MiTrònchi
E grupo di enfoke pa e kompetensia #MiTrònchi ta tur alumno di Kòrsou entre 4 pa 12 aña di edat ku ta bishitá skolnan di fundeshi i skolnan spesial (LOM, MLK, ZMLK & MYTHYL). E kompetensia ta pa konsientisá e muchanan di e balor i importansia di un desayuno balansá komo e alimento mas importante di dia.
#MiBòdiTa100
E grupo di enfoke pa e kompetensia #MiBòdita100 ta tur hóben di Kòrsou entre 13 pa 18 aña di edat ku ta bishitá skolnan avansá. E kompetensia aki ta pa konsientisá nos hóbennan ku moveshon i ehersisio físiko ta hopi importante pa por hiba un bida saludabel. E intenshon di e kompetensia ta pa hóbennan krea a base di e kansion “bòdi ta 100” di Area 51 un “total body workout”. Un hurado eksperto ta skohe e mihó “total body workout” i skol ganadó.
Workshop
Tur skol ku inskribí pa e proyekto #100PaSalú ta partisipá ku 2 representante na un workshop grátis ku MCB ta hasi posibel. Pa e trayekto di #MiTrònchi dietista nutrishonista señora Rachna Blom ta bai duna informashon di nutrishon balansá i kreativo usando “schijf van vijf” pa muchanan por tin un trònchi ku kontenido salú pa bai skol. Pa e trayekto di #MiBòdita100 a aserká e eksperto di moveshon señora Jaqueline Hol pa duna informashon tokante importansia di moveshon.
Klousura di e kompetensia #100PaSalú ta den luna di novèmber kaminda MCB ta bai organisá un evento grandi pa tur mucha i hóben na SDK i di un forma úniko MCB lo repartí mas ku NAf.30.000,- bou di e skolnan ganadó.
Skolnan atenshon! Inskripshon ta sera djárason 24 di ougùstùs
Pa partisipá na e kompetensia #100PaSalú di MCB skolnan mester inskribí promé ku djarason 24 di ougùstùs na 100pasalu@mcb-bank.com òf yama 4661295 òf 4660523. Tur skol ku a inskribí ta partisipá na un workshop grátis. E workshopnan ta tuma lugá e siman di djaluna 29 di ougùstùs pa djabièrnè 2 di sèptèmber na MCB. Durante partisipashon tur skol ta risibí tur material ku nan mester pa sigui pasa e konosementu pa tur mucha, dosente i mayor. 
Pa mas informashon por yama 466 0523 òf 466 1295. Tambe por manda un email pa 100pasalu@mcb-bank.com. Ban pa un skol i bida mas salú!