komo organisashon ku mas a duna un aporte positivo den nos komunidat

WILLEMSTAD- Na 1997 Maduro & Curiel’s Bank a inisiá ku e tradishon di entregá den luna di desèmber e prestigioso rekonosementu, MCB Prize. MCB Prize ta rekonosé un persona, evento, organisashon òf kompania ku a sobresalí i/òf a hasi mas impakto positivo den nos komunidat. E aña aki gerensia di Bo Banko Amigu a skohe pa duna un organisashon ku ta traha riba e aspekto sosial i

di boluntario.

Gerensia di Bo Banko Amigu a evaluá aña 2015 i ta ku honor ta entregá MCB Prize 2015 na un organisashon ku a demostrá su balor den nos komunidat dor di duna sosten importante na famianan ku ke ta mas serka di nan yu na momentu ku e yu ta malu i ta keda interná den hospital Sehos.

Un organisashon ku ta manehá for di aña 2012 un “Family Room” (kamber pa famia) banda di e departamentu di mucha di hospital Sint Elisabeth (Sehos). E Family Room aki ta ofresé banda di e sala familiar ku su kushina i komedor, e posibilidat na mayornan pa keda drumi i ta mas serka di nan yu ku ta malu. Tambe tin un sala di wega pa e muchanan ku tur sorto di ko’i hunga manera weganan edukativo, kòmpiüter, un area ku por hasi obra di man i un biblioteka pa mucha di tur edat. Naturalmente e weganan di PSP i Wii no por keda afó pa e muchanan por distraé kuné i lubidá un ratu di nan malesa.

Tur esaki ta wòrdu kordiná pa un grupo di boluntario inkansabel i ku ta hasi esaki ku hopi amor i dedikashon.

Pa e motibu aki, Maduro & Curiel’s Bank ta entregá MCB Prize 2015 na Ronald McDonald House Charities Curaçao Foundation.

Ronald McDonald House Charities Curaçao Foundation a keda fundá na desèmber 2009 ku e mishon pa krea i haña programanan di sosten ku direktamente ta mehorá salú i bienestar di muchanan na Kòrsou i nos islanan bisiña.

E vishon di e Fundashon ta ku nan ta kere firmemente ku ora bo kambia bida di un mucha, bo ta kambia bida di un famia tambe. Esaki por kambia e komunidat i al final mundu tambe. E Fundashon ta hasi su máksimo esfuerso pa forma parti di e kambio ei i parti di e solushon pa mehorá bida di muchanan i nan famia, door di ofresé programanan ku ta duna forsa na famianan i ta trese nan huntu durante temporadanan sumamente difisil. E fundashon ta konta ku un relashon fuerte ku e grupo di médiko ku ta duna akseso na kuido di salú.

Ta importante pa menshoná ku for di inisio te e aña aki, ya Ronald McDonald House Charities Curaçao Foundation a duna sosten i ayudo na 6123 famia na Kòrsou. Esaki sigur ta algu di aploudí i ta un indikashon aun mas fuerte ku nos a skohe nan komo ganador di MCB Prize 2015.

Nos ta yama un danki imenso na e tantísimo boluntarionan di Ronald MCDonald House Charities Curaçao Foundation ku ta duna nan sosten i koperashon den e proyekto aki i nos ta sigur ku e Fundashon aki lo haña e alokashon asina nesesario i importante den nos Hospital nobo!

Nos ta yama DANKI na Ronald McDonald House Charities Curaçao Foundation pa tur loke boso a hasi pa Kòrsou, pa nos muchanan i nan famia.