WILLEMSTAD- Miembronan di Direktiva di e tim Volibòl di Maduro & Curiel’s Bank pa di 5 aña konsekutivo ta organisá un torneo di Volibòl entre kompanianan lokal “MCB INTER-COMPANY VOLLEY TOURNAMENT”.
E meta prinsipal di e torneo meskos ku tur aña ta pa keda konsientisá empleadonan di kompanianan lokal pa sigui move i hasi deporte, espesialmente Volibòl. Esaki atraves di e aña a bin ta krese e lasonan di amistat ku sigur ta algu positivo. “MCB INTER-COMPANY VOLLEY TOURNAMENT” ta ranka sali djasabra 11 di novèmber 2017 pa 10or di mainta i lo terminá dia djadumingu 12 di novèmber 2017. E aña aki lo konta ku partisipashon di kompanianan manera: Refineria Isla – OMNI – ONDERWIJS – MCB – ADC – FDDK – CPA/KTK tur kompitiendo den e mes un kategoria.
E aña aki lo bira aun mas eksitante i interesante pa mira ken lo bai ku e título. Na 2013 MCB a titulá kampion, 2014 ISLA a rabia i bai ku’né. Na 2015 MCB no a pèrmití i a tumé bèk. 2016 ISLA tampoko no a tuma aden i a disidí di bolbe bai ku e premio. E aña akí MCB Volleyball 5th EDITION………. ken lo bai kuné? Lo ta un kompania nobo? Bini bo mes pa bo presensiá ku bo propio wowo ta ken lo bai ku e título.
Tur wega lo tuma lugá na Sala Odulio Willems i lo primintí di bira unu eksitante i eksitoso. Pues atraves di e komunikado aki nos ta invitá komunidat di Kòrsou kompletu i tur fanátiko di e deporte di volíbòl pa bin apoyá bo ekipo faborito. Entrada ta grátis i tur fanátiko di e kompanianan partisipante, kompanianan ku no ta partisipá i fanátikonan di Vòlibol i di deporte en general ta bon biní na Stadion Odulio Willems riba e fechanan ariba menshoná pa disfrutá di bon wega di Volíbòl i di un ambiente úniko.