WILLEMSTAD, – Ta konosí pa un i tur ku Maduro & Curiel’s Bank i RMHC ta duna un sosten grandi na nos komunidat. Awor nan a uni forsa i durante un rueda di prensa a sera un akuerdo di koperashon pa 3 aña, kaminda MCB ta bai duna un sosten finansiero di NAf. 150.000,- na RMHC pa nan sigui ku nan aktividatnan pa rekoudá fondo pa entre otro e “Family Room” di RMHC. Pa seya e akuerdo aki a traha un logo ku ta simbolisá e union fuerte aki.

Señor Michael de Sola, direktor di MCB, a bisa na e okashon aki ku: “Serando e akuerdo di koperashon aki nos ta enkurashá mas organisashon pa sera aliansa pa traha pa un meta komun. Den un aliansa organisashonnan ta mas fuerte pero tambe ta traha pa e meta komun di forma mas dirigí. Nos ta sumamente kontentu ku nos a duna e ehèmpel i sera e aliansa aki ku RMHC na bienestar di tur e muchanan ku ta hospitalisá na Sehos i nan famia. Ta sumamente importante pa RMHC ta ubiká den nos hospital nobo tambe pa nan por sigui ofresé nan servisio i na e mesun nivel ku nan a kustumbrá di duna. Dos kurason grandi ta bati pa un meta. Esaki ta netamente loke e logo ta simbolisá.”

Ronald McDonald House Charities Curaçao Foundation (RMHC) a wòrdu lantá na 2010 i ta manehá for di aña 2012 un “Family Room” banda di departamentu di mucha di Hospital St Elisabeth (Sehos). E “Family Room” RMHC ta ofresé banda di e sala familiar ku su kushina i komedor, e posibilidat na mayornan pa keda drumi i ta mas serka di nan yu malu. Tambe RMHC tin un sala di wega pa e muchanan ku tur sorto di ko’i hunga. Tin weganan edukativo, un huki ku kòmpiuter, un área ku por hasi obra di man i un biblioteka pa mucha di tur edat. E weganan elektróniko popular PSP i WII tambe muchanan por distraí kuné i lubidá un ratu di nan malesa.

RMHC ta duna un sosten importante na famianan, ku pa motibu di malesa i peliger pa bida, mester wòrdu manda afó pa tratamentu. Un eksperensia manera esaki tin un impakto hopi dramátiko den nan bida i hopi mayor i mucha mester di un èkstra sosten. For di komienso di su trabounan na Sehos, RMHC a logra yuda ya mas ku 5000 famia durante nan periodo di strès i preokupashon komo konsekuensia di nan yu su malesa.

“RMHC no ta risibí ningun tipo di supsidio i ta funshoná kasi kompletamente a base di boluntario. Pa e motibu aki nos ta hopi kontentu ku e gesto tan importante aki di MCB”, asina presidente di RHMC, señora Claudia Rigaud a bisa. “Ku e kontribushon aki nos por sigui ku e trabou balioso pa hasi e tempunan disifil di e famianan ku yu malu, mas plasentero”.