Awe ta e dia ofisial pa inisio di MCB Curaçao Masters 2017, ku kual e di diesun edishon di e magno torneo aki ta bira un hecho. E organisashon ta kla i ku hopi deseo pa presentá un biaha mas e fiesta di mas grandi di gòlf di e region di Karibe. MCB i Blue Bay di kurason ta invitá Kòrsou pa bin disfrutá di gòlf na nivel haltu kombiná ku e diferente aktividatnan pa grandi i chikí, Djasabra dia 8 di aprel na Blue Bay Resort.
Patrosinadònan
Bo Verhagen, koordinó di evento di Blue Bay Resort ta pone e afirmashon den forma kla i konkreto: “E siman espektakular di gòlf ta a kuminsá. Ta ku masha plaser nos resort a duna bonbiní na tur e profeshonalnan di rònt mundu ku ta aki, loke ta sigurá nos di ta bai tin un siman inolvidabel”, e ta bisa.
Verhagen ta ekspresá gratitut pa patrosinador prinsipal, Maduro & Curiel’s Bank. Spònsernan di platina ta KLM, Spigt Dutch Caribbean, Deloitte i Gillette. Patrosinadornan di Oro: Peter Reijmer Grafisch Vormgever (PRGV), One Media Group, Señal Sign i GrowPromoter. Patrosinadòrnan di plata: Anton Pijpers Sound & Lights, National Car Rental, FBTT, Heineken, The Wine Factory, Event Services, Avianca, Café Barista, Soemanta.com, Volkswagen Curaçao, C3 Critical Communication Caribbean, Horizon i Rainbird.
Programa
Djarason dia 5 di Aprel, muchanan di 6 pa 12 aña ta bonbiní for di 14:30 na Blue Bay Golf Club. Esaki tantu pa yunan di e patrosinadònan komo muchanan en general. Durante di e mèrdia aki, tur mucha lo haña e oportunidat pa sera konosí ku e deporte di gòlf. Lo bai tin un klínika interaktivo ku e profeshonalnan lo duna. Ademas lo tin otro aktividatnan deportivo pa entren’é nan. Por inskribí pa esaki na www.curacaomasters.com.
E Torneo Pro-Am lo ta durante di tres dia, djaweps dia 6, 20 profeshonal i e amatùrnan lo drenta den akshon na Blue Bay Golf Course. E amatùrnan mester tin un wega na nivel di hèndikèp 10 òf ménos. Riba djabièrnè dia 7 i djasabra 8 respektivamente na Curaçao Golf & Squash Club na Emmastad i Blue Bay Golf. E tim di gòlf ta konsistí di un profeshonal i tres amatùr. Djasabra dia 8 di aprel e torneo lo tin su dia final na Blue Bay ku hopi aktividat di gòlf i entretenimentu. E ta bai bira atrobe un dia di famia, for di 2or di mèrdia. Tur hende ta invitá pa bin sinta riba e tribuna den sombra pa disfrutá di e nivel internashonal di gòlf. Ademas di e hopi aktividatnan i kosnan di kome i bebe. Entrada pa e dia di famia aki ta apsolutamente grátis.
Anfitrion
Gonzalo Cuales, un persona konosí di radio i televishon lo ta e anfitrion di MCB Masters. E mes ta un gran amante di e deporte i e ta enkantá ku e hecho ku e por kompartí su pashon pa e deporte ku e públiko. Nan lo por aserk’é naturalmente pa kualkier pregunta relashoná ku e deporte. Por tira un bista riba www.curacaomasters.com & www.facebook.com/bluebaygolf pa mas informashon.